‘মুছলমান বাবেই মোক মন্ত্ৰী পদৰ পৰা বাহিৰ কৰিলে’-অভিযোগত তোলপাৰ ৰাজনৈতিক মহল

ডিজিটেল ডেস্কঃ ‘মই মুছলমান বাবেই মোক মন্ত্ৰী পদৰ পৰা বাহিৰ কৰিলে’ এই ভয়ংকৰ অভিযোগ ব্ৰিটেইনৰ মন্ত্ৰীসভাৰ এগৰাকী নেত্ৰীৰ। নেত্ৰীগৰাকীৰ এই মন্তব্যৰ পাছতেই তোলপাৰ লাগিছে ব্ৰিটেইনৰ ৰাজনৈতিক মহলত। ৪৯ বৰ্ষীয় নেত্ৰীগৰাকীৰ নাম নুছৰত গনী। নুছৰত গনীক ২০২০ চনত ব্ৰিটেইনৰ মন্ত্ৰীসভাৰ পৰা বাহিৰ কৰা হৈছিল। নুৰছত গনী পাকিস্তানীয় মূলৰ। আনহাতে প্ৰধানমন্ত্ৰী বৰিছ জনছন আৰু তেখেতৰ মন্ত্ৰীসভাই এই অভিযোগ নস্যাৎ কৰিছে। প্ৰধানমন্ত্ৰী বৰিছ জনছনে কয় যে ''তেওঁলোকৰ দলে কোনোদিনে কোনো মানুহৰ মাজত কোনোধৰণৰ ভেদ-ভাৱ কৰা নাই।নুছৰত গনীয়ে এয়া মনে সজা কথা কৈছে। এয়া সম্পূৰ্ণ মিছা অপবাদ।'' উল্লেখ্য নুছৰত গনীক ২০২০ চনত ব্ৰিটেইনৰ পৰিবহন মন্ত্ৰী পদৰ পৰা বৰ্খাস্ত কৰা হৈছিল। নুছৰত গনীয়ে ইয়াৰ পাছত এখন সভাত কয় যে তেওঁ মুছলমান হোৱা বাবেই বৰিছ জনছনে এই সিদ্ধান্ত গ্ৰহণ কৰে। তেওঁ মুছলমান হোৱাৰ বাবেই সহকৰ্মী সকলে অস্বস্তি অনুভৱ কৰে। সেয়ে তেওঁক মন্ত্ৰী পদৰ পৰা বৰ্খাস্ত কৰা হৈছিল। ইয়াৰ পাছতেই বহুতেই নুৰছত গনীলৈ আঙুলি টোৱাই কয় যে যদিহে ব্ৰিটেইন চৰকাৰে এনে এটা নিকৃষ্ট কাম কৰিছিলেই তেন্তে তেওঁ তেতিয়াই মাত নামাতি এতিয়া মাত মতাৰ কাৰণ কি? সেই প্ৰশ্নত নুৰছতে কয় যে সেই সময়ত এগৰাকী মহিলা হিচাপে তেওঁ অপমানিত আৰু শক্তিহীন অনুভৱ কৰিছিল। তেওঁক কোনোৱে লগ নিদিব আৰু সম্পূৰ্ণ কেৰিয়াৰেই ধ্বংস হৈ যাব বুলি ভয় খাইছিল। নুৰছত গনীৰ এই মন্তব্যৰ তদন্ত কৰাটো বিচাৰিছে অন্য ৰাজনৈতিক দলসমূহে। শাসনৰ গাদীত থকা বৰিছ জনছন চৰকাৰক এনেদৰে কৈ নুৰছত গনীয়ে একপ্ৰকাৰ অপমান কৰা বুলি নেত্ৰীগৰাকীৰ বিৰুদ্ধে অভিযোগ তুলিছে একাংশই। উল্লেখ্য যে ২০১৮ চনত বাতৰি কাকতৰ এক স্তম্ভলেখাত বৰিছ জনছনে বোৰ্খা পিন্ধা মুছলমান মহিলাসকলক 'লেটাৰ বক্স' আৰু 'বেংক ডকাইত'ৰ দৰে দেখায় বুলি লিখি ব্যাপক সমালোচনাৰ সন্মুখীন হৈছিল। আৰু পঢ়কঃ ১০ টকা আছেনে?গাড়ী কিনিবলৈ যোৱা কৃষকক ছেলছমেনৰ ঠাট্টা; ১০ লাখ টকা লৈ হাজিৰ কৃষক