মুখ্যমন্ত্ৰীৰ কনভয়ৰ ছখন গাড়ী, ট্ৰেফিকত দুই মিনিট: কিমান দিনলৈ কাৰ্যকৰী?

ডিজিটেল ডেস্ক: কালি অসম চৰকাৰৰ কেবিনেট বৈঠকত মুখ্যমন্ত্ৰীৰ কনভয় সম্পৰ্কত এক সিদ্ধান্ত গ্ৰহণ কৰা হয়৷ কেবিনেট বৈঠকৰ সিদ্ধান্তমৰ্মে এতিয়াৰে পৰা ৰাজ্যৰ মুখ্যমন্ত্ৰীৰ কনভয়ত এছক’ৰ্ট আৰু পাইলট গাড়ীসমূহক বাদ দি গুৱাহাটী মেট্ৰ’পলিটান এলেকাৰ ভিতৰত ৬খন আৰু অন্যান্য এলেকা/জিলাত ১২খনত সীমাবদ্ধ থাকিব৷ জনসাধাৰণৰ সুবিধাৰ প্ৰতি লক্ষ্য ৰাখি মুখ্যমন্ত্ৰীৰ যাত্ৰাকালত জনসাধাৰণৰ বাহনৰ ক্ষেত্ৰত সুৰক্ষাজনিত অত্যন্ত প্ৰয়োজনত সৰ্বাধিক দুই মিনিটৰ বাবেহে বাহন চলাচল স্থগিত কৰিব পাৰিব৷ কালিৰ কেবিনেটত মুখ্যমন্ত্ৰীৰ কনভয়ৰ এই সিদ্ধান্ত সম্পৰ্কত এতিয়া মিশ্ৰিত প্ৰতিক্ৰিয়াৰ সৃষ্টি হৈছে৷ কেবিনেটৰ এই সিদ্ধান্ত মুখ্যমন্ত্ৰীৰ জনপ্ৰিয়তা বঢ়াবলৈ গ্ৰহণ কৰা হৈছে বুলিও সামাজিক মাধ্যমত বহুজনে মন্তব্য কৰা পৰিলক্ষিত হৈছে৷ ইয়াৰ পূৰ্বেও প্ৰাক্তন মুখ্যমন্ত্ৰী সৰ্বানন্দ সোণোৱালে দায়িত্বভাৰ গ্ৰহণ কৰিয়েই নিৰাপত্তাৰক্ষী কমোৱাৰ লগতে কনভয়ৰ বাবে জনসাধাৰণে অসুবিধাৰ সন্মুখীন হ’ব নালাগে বুলি আশ্বাস দিছিল৷ কিন্তু, সৰ্বানন্দ সোণোৱালৰ সেই সিদ্ধান্ত দীঘলীয়া নহ’ল৷ জনসাধাৰণক অসুবিধাত পেলাই চলি থাকিল মুখ্যমন্ত্ৰী সোণোৱালৰ কনভয়ৰ অহা-যোৱা৷ এতিয়া পুনৰ কনভয় বিষয়ক সিদ্ধান্ত গ্ৰহণ কৰিছে বৰ্তমানৰ মুখ্যমন্ত্ৰী হিমন্ত বিশ্ব শৰ্মাই৷ অসমত মুখ্যমন্ত্ৰীৰ কনভয়ৰ ৰাজকীয় আদৱ-কায়দাৰ প্ৰসংগ কোনো নতুন কথা নহয়৷ হিতেশ্বৰ শইকীয়াৰ দিনৰ পৰা হিমন্ত বিশ্ব শৰ্মাৰ দিনলৈ কনভয়ৰ কাৰচাজি অব্যাহত আছে৷ এতিয়া বিভিন্নজনে এইবুলিও মন্তব্য কৰিছে যে মুখ্যমন্ত্ৰীয়ে আত্মপ্ৰচাৰ অথবা নিজৰ জনপ্ৰিয়তা বৃদ্ধি কৰাবলৈ এই সিদ্ধান্ত গ্ৰহণ কৰিছে৷ এই সিদ্ধান্ত কিমান দীৰ্ঘস্থায়ী হয়, সময় যোৱাৰ লগে লগে সেয়া স্পষ্ট হ’ব৷ শেহতীয়াকৈ মুখ্যমন্ত্ৰীয়ে অসমত এতিয়া উগ্ৰপন্থীৰ কাৰ্যকলাপ প্ৰায় নাইকীয়া হোৱা বুলি সঘনাই কৈ আছে৷ মুখ্যমন্ত্ৰীয়ে কোৱাৰ লেখীয়াকৈ উগ্ৰপন্থীৰ কাৰ্যকলাপ নাইকীয়া হোৱাৰ বাবে মুখ্যমন্ত্ৰীয়ে কনভয়ৰ গাড়ীৰ সংখ্যা সীমিত কৰিছে নে কি, সেইটো অসম চৰকাৰৰ গৃহ বিভাগৰ তত্বাৱধানৰ বিষয়৷ কিন্তু, মুখ্যমন্ত্ৰীৰ নতুন সিদ্ধান্ত কিমান দিনলৈ কাৰ্যকৰী হৈ থাকে, সেইটোহে গুৰুত্বপূৰ্ণ৷ মুখ্যমন্ত্ৰীৰ কনভয়ৰ গাড়ীৰ সংখ্যা সীমিত হ’লেই নহ’ব, একেদৰে অপ্ৰয়োজনীয় ভ্ৰমণ পৰিহাৰ কৰিব পাৰিলেও জনসাধাৰণে সকাহ পাব৷ বিয়া-সবাহ, অন্যান্য অনুষ্ঠান য’লৈকে নগ’লেও হয়, তেনে অনুষ্ঠানলৈ মুখ্যমন্ত্ৰী, মন্ত্ৰী, বিধায়ক নোযোৱা মানেই ৰাইজৰ সকাহ৷ ভিভিআইপিৰ আগমনৰ লগে লগে বহু পূৰ্বৰে পৰা আৰক্ষী বিভাগ ৰাজপথত বিভিন্নধৰণে ব্যস্ত হৈ স্বাভাৱিক জীৱনযাত্ৰা ব্যাহত কৰি তোলে৷ আৰু, তেনে কৰাতো কোনো কাৰণতে গ্ৰহণযোগ্য নহয়৷ আন এটা কথা, মুখ্যমন্ত্ৰীয়ে অথবা কেবিনেটে সিদ্ধান্ত ল’লেও চোৰাংচোৱাৰ খবৰৰ ভিত্তিত আৰক্ষীয়ে পুনৰ মুখ্যমন্ত্ৰীৰ নিৰাপত্তাৰক্ষী বঢ়াই দিয়াৰ নজিৰ আছে৷ সেয়ে এতিয়া লক্ষ্যণীয় হ’ব, কালিৰ কেবিনেটৰ সিদ্ধান্ত কিমান দীঘলীয়া হয় আৰু ৰাইজে তাৰপৰা কি ধৰণে উপকৃত হয়৷