ডিজিটেল ডেস্ক: ড্ৰাগছ বিৰোধী অভিযানৰ ক্ষেত্ৰত এক বৃহৎ সফলতা লাভ কৰিছে মুম্বাই আৰক্ষীয়ে। মুম্বাই আৰক্ষীৰ ‘এণ্টি নাৰ্কোটিক্স চেল’ গোটে গুজৰাটৰ ভাৰুচ জিলাৰ অংকলেশ্বৰ অঞ্চলত এটা ঔষধ নিৰ্মাণ কাৰখানাত অভিযান চলাই ৫১৩ কিলোগ্ৰাম নিষিদ্ধ মেফেড্ৰোন জব্দ কৰিছে। জব্দকৃত এই নিচাজাতীয় ঔষধসমূৰ মূল্য আন্তঃৰাষ্ট্ৰীয় বজাৰত প্ৰায় ১,০২৬ কোটি টকা হ'ব বুলি আৰক্ষীয়ে জানিবলৈ দিছে।
ইতিমধ্যে মেফেড্ৰোন নিৰ্মাণ গোটৰ গৰাকী গিৰিৰাজ দীক্ষিতকো আৰক্ষীয়ে গ্ৰেপ্তাৰ কৰিছে। আৰক্ষীয়ে জানিবলৈ দিয়া মতে গিৰিৰাজ দীক্ষিতে আন এজন লোকৰ সৈতে পৰীক্ষা-নিৰীক্ষা চলাই মেফেড্ৰোন প্ৰস্তুত কৰাৰ সূত্ৰটো কাৰ্যকৰী কৰিছিল।
উল্লেখ্য যে চলিত মাহৰ আৰম্ভণিতে মুম্বাইৰ ওচৰৰ নালাচোপাৰাৰ পৰা প্ৰায় ১,৪০০ কোটি টকা মূল্যৰ ৭০০ কিলোগ্ৰাম মেফেড্ৰোন জব্দ কৰিছিল। এই অভিযানৰে পাছৰ তদন্ত প্ৰক্ৰিয়াত এই ভয়ংকৰ চোৰাং বেহাৰ কথা পোহৰলৈ আহে আৰু অনুসন্ধান অভিযান আৰম্ভ কৰিছিল।
আৰক্ষীয়ে ইতিমধ্যে ২,৪৩৫ কোটি টকা মূল্যৰ ১,২১৮ কিলোগ্ৰাম ড্ৰাগছ জব্দ কৰিছে আৰু গোচৰটোত ৭ জন লোকক গ্ৰেপ্তাৰ কৰিছে। বিগত মাৰ্চ মাহত মাত্ৰ ২৫০ গ্ৰাম ঔষধ উদ্ধাৰৰ পাছতে আৰক্ষীয়ে এই অবৈধ কাৰবাৰৰ বিৰুদ্ধে তদন্ত আৰম্ভ কৰিছিল।
Continue Reading
