মুম্বাইত চৰকাৰী চাকৰিৰ প্ৰলোভন দেখুৱাই বৃহৎ প্ৰৱঞ্চনা: ৭টা পৰিয়ালৰ ৬৮.৫ লাখ টকা লুটিলে

মুম্বাই, ৩১ জুলাই: চৰকাৰী চাকৰিৰ ভুৱা প্ৰতিশ্ৰুতিৰে মুম্বাইত সাতটা পৰিয়ালৰ পৰা প্ৰায় ৬৮.৫ লাখ টকা সংগ্ৰহ কৰি এক বৃহৎ প্ৰৱঞ্চনা চলোৱাৰ ঘটনা পোহৰলৈ আহিছে। অভিযুক্তসকলে মহাৰাষ্ট্ৰৰ মন্ত্ৰালয়ত (ৰাজ্যিক সচিবালয়) তেওঁলোকৰ প্ৰভাৱশালী যোগাযোগ থকা বুলি দাবী কৰিছিল। এই সন্দৰ্ভত আজাদ ময়দান আৰক্ষীয়ে এটা প্ৰৱঞ্চনাৰ গোচৰ ৰুজু কৰিছে আৰু অভিযুক্তসকলৰ সন্ধানত অভিযান আৰম্ভ কৰিছে।

মুম্বাই আৰক্ষী সূত্ৰে জানিব পৰা মতে, চৰকাৰী চাকৰিৰ প্ৰলোভন দেখুৱাই কেইবাটাও পৰিয়ালৰ পৰা লাখ লাখ টকা সংগ্ৰহ কৰা এই জালিয়াতি চক্ৰটোৱে দীৰ্ঘদিন ধৰি কাৰ্যকলাপ চলাই আহিছিল। ভুক্তভোগীসকলৰ অভিযোগৰ ভিত্তিত, আজাদ ময়দান আৰক্ষীয়ে প্ৰৱঞ্চনা আৰু অপৰাধমূলক বিশ্বাস ভংগৰ অভিযোগত দুজনকৈ লোকৰ বিৰুদ্ধে গোচৰ তৰিছে।

তদন্তকাৰী বিষয়াসকলে প্ৰকাশ কৰিছে যে এই কেলেংকাৰীটো ২০১৪ চনৰ পৰাই চলি আহিছে। ভুক্তভোগীসকলৰ ভিতৰত জি টি হাস্পতালৰ এগৰাকী অৱসৰপ্ৰাপ্ত চিষ্টাৰ-ইন-চাৰ্জো আছে, যিয়ে তেওঁৰ পুত্ৰৰ বাবে চাকৰিৰ সন্ধান কৰি আছিল। অভিযোগ অনুসৰি, তেওঁৰ এজন ওচৰ-চুবুৰীয়া আৰু সহকৰ্মী সূৰ্যকান্ত নিবৃত্তি মাগ্ৰেয়ে তেওঁৰ সৈতে যোগাযোগ কৰি চৰকাৰী চাকৰিৰ প্ৰস্তাৱ দিছিল। মাগ্ৰেই দাবী কৰিছিল যে তেওঁৰ আত্মীয় যোগেশ জগন্নাথ পাটংকৰ মন্ত্ৰালয়ত কৰ্মৰত আছিল আৰু তেওঁৰ প্ৰভাৱশালী সংযোগৰ জৰিয়তে চাকৰি যোগাৰ কৰি দিব পাৰিব। এনেদৰেই সাতটা পৰিয়ালৰ পৰা বিভিন্ন সময়ত ৬৮.৫ লাখ টকা সংগ্ৰহ কৰা হৈছিল। আৰক্ষীয়ে এই ঘটনাৰ গভীৰ তদন্ত অব্যাহত ৰাখিছে আৰু অভিযুক্তসকলক সোনকালে গ্ৰেপ্তাৰ কৰাৰ বাবে চেষ্টা চলাই আছে।