ডিজিটেল ডেস্কঃ এক শিহৰণকাৰী ঘটনা সংঘটিত হৈছে মুম্বাইত। পৰিয়ালৰ সৈতে পিকনিক খাবলৈ গৈ কৰুণ মৃত্যুক সাৱটিলে এগৰাকী মহিলাই। মুম্বাইৰ বান্দ্ৰা বেণ্ডষ্টেণ্ডত সাগৰৰ ঢৌৱে এগৰাকী ৩২ বছৰীয়া মহিলা উটুৱাই নিয়ে। মাকক ঢৌৱে উটুৱাই নিয়াৰ সময়ত অসহায়ভাবে চাই ৰৈছিল সন্তানসহ স্বামীয়ে।
সাগৰৰ ঢৌৱে উটুৱাই নি মৃত্যু ঘটোৱা মহিলাগৰাকীৰ নাম জ্যোতি সোণাৰ। মহিলাগৰাকীয়ে তেওঁৰ স্বামী আৰু পুত্ৰ আৰু কন্যাৰ সৈতে পিকনিক খাবলৈ সাগৰৰ পাৰলৈ গৈছিল। তেওঁলোকে জুহু চৌপথীলৈ যোৱাৰ কথা আছিল। কিন্তু জোৱাৰৰ ঢৌৰ বাবে জুহু চৌপথী বন্ধ থকা বাবে তেওঁলোকে বান্দ্ৰালৈ যোৱাৰ সিদ্ধান্ত লৈছিল।
স্বামী-স্ত্ৰীয়ে এটা শিলৰ ওপৰত বহি ফটো উঠি আছিল। এনে সময়তে সাগৰৰ এটা প্ৰচণ্ড ঢৌৱে দম্পতীহালক কোবাই যায়। । মুহূৰ্ততে মহলাগৰাকী উটি যায়। ঘটনাটোৰ দৃশ্য বুলি দাবী কৰা এটা ভিডিঅ' সামাজিক মাধ্যমত ভাইৰেল হৈ পৰিছে। অৱশ্যে, প্ৰাগ নিউজ ডিজিটেলে ভিডিঅ'টোৰ সত্যতা প্ৰমাণিত কৰা নাই।
ভাইৰেল ভিডিঅ'টোত, জ্যোতিক ঢৌৱে উটুৱাই নিয়া দেখা গৈছে। স্থানীয় সূত্ৰ অনুসৰি একাংশ লোকে জ্যোতিৰ স্বামীক ভৰিত খামুচি ধৰি ৰক্ষা কৰিছিল। কিন্তু জ্যোতিক বিচাৰি উলিয়াব পৰা নগ'ল। পিছত ডুবাৰুৱে তেওঁৰ মৃতদেহ উদ্ধাৰ কৰিবলৈ সক্ষম হয়। ঘটনাস্থলীত উপস্থিত থকা মুকেশ নামৰ এজন ব্যক্তিয়ে দাবী কৰিছে যে তেওঁ শেষ মুহূৰ্তত জ্যোতিৰ শাৰীখন ধৰিছিল। কিন্তু তেওঁ মহিলাগৰাকীক ৰক্ষা কৰিব নোৱাৰিলে।
