মুম্বাইত হৰ্ডিং খহি পৰাৰ ঘটনাত নিহতৰ সংখ্যা ১৪ জনলৈ বৃদ্ধি, নিহতৰ পৰিয়াললৈ চৰকাৰৰ ৫ লাখকৈ টকাৰ সাহায্য ঘোষণা, ৰে'লৱেৰ বিৰুদ্ধে গোচৰ ৰুজু কৰিব বিএমচিয়ে

মুখ্যমন্ত্ৰীয়ে ঘটনাটোত নিহতসকলৰ পৰিয়ালক ৫ লাখকৈ টকাৰ সাহায্য প্ৰদান কৰিব বুলিও  আশ্বাস দিয়ে । তেওঁ কয়, " অবৈধ আৰু বিপজ্জনকভাবে থকা হৰ্ডিংবোৰ তৎক্ষণাৎ আঁতৰ কৰা হ'ব।" চিন্দেই লগতে কয়  "এয়া   অতি দুৰ্ভাগ্যজনক ঘটনা। চৰকাৰে ইয়াৰ তদন্ত কৰিব, আৰু দোষী লোকসকলে শাস্তিৰ  সন্মুখীন হ'ব।" তেওঁ ঘটনাটোত নিহত প্ৰতিজন ব্যক্তিৰ আত্মীয়ক ৫ লাখ টকাৰ সাহায্য প্ৰদানৰ কথা ঘোষণা কৰে। ঘটনাটোত আহত লোকসকল চহৰৰ বিভিন্ন চিকিৎসালয়ত চিকিৎসাধীন হৈ আছে। ঘাটকোপাৰৰ ৰাজাৱাড়ী চিকিৎসালয়, নাগৰিক পৰিচালিত এইচবিটি চিকিৎসালয়, বিক্ৰোলীৰ মহাত্মা জ্যোতিবা ফুলে চিকিৎসালয় আৰু কালৱাৰ প্ৰক্ৰুতি চিকিৎসালয়ত বহু আহত লোকক ভৰ্তি কৰোৱা হৈছে।

 ইপিনে  বৃহন্মুম্বাই পৌৰ নিগম (বিএমচি) আৰু ভাৰতীয় ৰে'লৱেৰ মাজত দুৰ্ঘটনাটোকলৈ বিবাদৰ সৃষ্টি হৈছে। ভূমিৰ মালিকীস্বত্বক লৈ দোষাৰোপৰ খেল আৰম্ভ হৈছে। হৰ্ডিংখন "অবৈধ" বুলি ঘোষণা কৰি বিএমচিয়ে কয় যে ই হৰ্ডিংখনৰ  অনুমোদন নাছিল। "এইটো এটা অবৈধ হৰ্ডিং আছিল। ঘটনাটো সংঘটিত হোৱা স্থান ৰে'লৱেৰ ভূমি। তাত  চাৰিখন হৰ্ডিং স্থাপন কৰা হৈছে, আৰু তাৰে এখন খহি পৰিছে," বিএমচি আয়ুক্ত ভূষণ গগৰাণীয়ে কয়। বিএমচিয়ে ঘাটকোপাৰত হৰ্ডিং পৰি যোৱাৰ ঘটনা সন্দৰ্ভত ৰে'লৱে আৰু বিজ্ঞাপন কোম্পানী ইগো মিডিয়াৰ বিৰুদ্ধে গোচৰ তৰিব বুলিও কয়।  ইপিনে হৰ্ডিং খহি পৰা স্থান ৰে'লৱেৰ ভূমি নহয় বুলি ৰে’লৱেই স্পষ্ট কৰি দিছে।  ৰে’ল বিভাগৰ সূত্ৰই কয়  "এই হৰ্ডিং  ৰে'লৱেৰ ভূমিত নাই আৰু ই কোনো প্ৰকাৰে ভাৰতীয় ৰে'লৱেৰ সৈতে সম্পৰ্কিত নহয়"।