মুতালধাৰা জলপ্ৰপাত চাবলৈ পাহাৰৰ ওপৰলৈ উঠি গ’ল ঠিকেই, কিন্তু নামি আহিবহে নোৱাৰিলে! পাহাৰতে আবদ্ধ ৮৫ গৰাকী পৰ্যটক

পাহাৰৰ ওপৰতেই তেওঁলোক আবদ্ধ হৈ ৰৈছে। খবৰ পোৱাৰ পিছতে  দুৰ্যোগ সঁহাৰি বাহিনী উদ্ধাৰ অভিযান চলাই   ৮৫ গৰাকী  পৰ্যটকক উদ্ধাৰ কৰিবলৈ চেষ্টা চলাই আছে। ঘটনাটো বৃহস্পতিবাৰে তেলেংগানাৰ মুলুগু জিলাৰ মুতালধাৰা  জলপ্ৰপাতৰ ওচৰত সংঘটিত হৈছে। 

প্ৰচণ্ড বৰষুণৰ ফলত পাহাৰৰ পৰা তীব্ৰ বেগেৰে পানী তললৈ নামি আহিছে।  ইয়াৰ মাজতে পাহাৰৰ টিঙত আবদ্ধ হৈ পৰা পৰ্যটকসকলে উদ্ধাৰৰ আশাত অপেক্ষা কৰি আছে। বিপদৰ কথা  জনা স্বত্বেও পৰ্যটকসকলে বাৰিষাৰ সময়ত মুতালধাৰা জলপ্ৰপাত চোৱাৰ লোভ সামৰিব পৰা নাছিল। ৮৫ জনীয়া এটা দলে বুধবাৰে খোজকাঢ়ি  পাহাৰৰ ওপৰলৈ যাত্ৰা আৰম্ভ কৰিছিল। তেওঁলোকৰ গন্তব্যস্থানত উপনীত হোৱাৰ পিছত আজি  উভতি অহাৰ পথত বিপদত পৰে। বৰষুণৰ ফলত পানীৰ স্তৰ বৃদ্ধি হোৱাৰ লগে লগে পৰ্যটকসকল পাহাৰীয়া অৰণ্যৰ মাজত আৱদ্ধ হৈ পৰে। তেওঁলোকে গোটেই ৰাতি তললৈ নামিবলৈ চেষ্টা কৰিছিল কিন্তু কোনো উপায় বিচাৰি পোৱা নাছিল। পিছত, পৰ্যটকসকলে স্থানীয় আৰক্ষী, ৰাজ্যিক দুৰ্যোগ সঁহাৰি বাহিনী আৰু ৰাষ্ট্ৰীয় দুৰ্যোসঁহাৰি বাহিনীক অৱগত কথাটো কৰে। তথ্য পোৱাৰ লগে লগে, ৫০  জন লোকে  উদ্ধাৰৰ বাবে ঘটনাস্থলীলৈ ৰাওনা হয়। 

উল্লেখ্য ধাৰাসাৰ বৰষুণৰ বাবে তেলেংগানাৰ কেইবাখনো জিলাত ৰেড এলাৰ্ট জাৰি কৰা হৈছে। মানুহক  অতি প্ৰয়োজন নোহোৱালৈকে ঘৰৰ বাহিৰলৈ  নাযাবলৈ পৰামৰ্শ  দিয়া হৈছে। ৰাজ্য চৰকাৰে আনকি বৃহস্পতিবাৰে তেলেংগানাৰ সকলো বিদ্যালয় বন্ধ ৰখাৰ নিৰ্দেশ দিছে।