ডিজিটেল ডেস্কঃ দেওবাৰে নিশা ৫ মে’ৰ নেট পৰীক্ষাত গ্ৰেচ নম্বৰ পোৱা ছাত্ৰ-ছাত্ৰীৰ দ্বিতীয় পৰীক্ষাৰ ফলাফল প্ৰকাশ কৰে ৰাষ্ট্ৰীয় পৰীক্ষণ সংস্থাই। NEET ৰ পুনৰ অনুষ্ঠিত পৰীক্ষাৰ ফলাফল ওলোৱাৰ লগে লগে দেখা গ’ল যে ৫ মে’ৰ পৰীক্ষাত ৫ গৰাকী টপাৰ আৰু শীৰ্ষ স্থানত নাই। প্ৰথমবাৰ ৭২০ নম্বৰৰ ভিতৰত ৭২০ নম্বৰ পোৱা ৬ গৰাকী পৰীক্ষাৰ্থীৰ ভিতৰত ৫ গৰাকীয়ে পুনৰ পৰীক্ষাত অৱতীৰ্ণ হয়। কিন্তু তেওঁলোকৰ কোনোৱেই টপাৰ হ’ব নোৱাৰিলে। প্ৰথমবাৰ সৰ্বভাৰতীয় মেধাৰ তালিকাত ৬৭গৰাকী টপাৰ আছিল, কিন্তু পুনৰ পৰীক্ষাৰ পিছত টপাৰৰ সংখ্যা হ্ৰাস পালে। ফলত বিগত পৰীক্ষাক লৈ সৃষ্টি হোৱা বিতৰ্কই নতুন পাক গ্ৰহণ কৰিছে।
প্ৰসংগক্ৰমে ইয়াৰ পূৰ্বে এনটিএই ঘোষণা কৰিছিল যে গ্ৰেচ নম্বৰ পোৱা ১ হাজাৰ ৫৬৩ গৰাকী পৰীক্ষাৰ্থীয়ে পুনৰ পৰীক্ষাত অৱতীৰ্ণ হ’ব পাৰিব। কাৰণ, উচ্চতম ন্যায়ালয়ত গোচৰ চলাৰ পিছত তেওঁলোকৰ গ্ৰেচ মাৰ্ক বাতিল কৰাৰ সিদ্ধান্ত লোৱা হৈছিল। কিন্তু গ্ৰেচ নম্বৰ পোৱা ১৫৬৩ গৰাকীৰ ভিতৰত মাত্ৰ ৫২ শতাংশ অৰ্থাৎ ৮১৩ গৰাকীয়েহে পুনৰ নীট ইউ জিৰ পৰীক্ষাত অৱতীৰ্ণ হৈছিল। উল্লেখযোগ্য যে পৰীক্ষা পলমকৈ আৰম্ভ হোৱাৰ দোহাই দি ৫ মে’ৰ নীট পৰীক্ষাত মেঘালয়, হাৰিয়ানা, চণ্ডীগড়, গুজৰাট আৰু ছত্তীশগড়ৰ মুঠ ছটা পৰীক্ষা কেন্দ্ৰত পৰীক্ষাৰ্থীসকলক অতিৰিক্ত নম্বৰ দিয়া হৈছিল। অভিযোগ অনুসৰি এই পৰীক্ষাৰ্থীসকলক সৰ্বাধিক ১৪০ নম্বৰ পৰ্যন্ত গ্ৰেচ মাৰ্ক দিয়া হৈছিল। যাৰ বাবে বহুতে ৭২০ ৰ ভিতৰত ৭২০ নম্বৰেই পাইছিল।
NEET-UG ২০২৪ৰ প্ৰশ্নকাকত ফাদিল কেলেংকাৰিৰ ‘মাষ্টাৰমাইণ্ড’ সঞ্জীৱ মুখীয়াক এতিয়াও গ্ৰেপ্তাৰ কৰিব পৰা নাই চিবিআইয়ে। গোচৰটোৰ আন অভিযুক্তসকলে তদন্তকাৰী বিষয়াক জনোৱা মতে, মুখীয়াই বিহাৰৰ পাটনা আৰু নালন্দাৰ পৰা ‘প্ৰশ্ন ফাদিল নেটৱৰ্ক’ চলাইছিল । উত্তৰ প্ৰদেশ, মধ্যপ্ৰদেশ, ৰাজস্থান, পশ্চিম বংগ, মহাৰাষ্ট্ৰ, গুজৰাট আদি কিছুমান ৰাজ্যত তেওঁৰ সক্ৰিয় সহযোগী আছিল।
Continue Reading
