ডিজিটেল ডেস্ক: বিগত বৰ্ষৰ ১ ডিচেম্বৰতে মুক্তি পাইছিল সন্দীপ ৰেড্ডীৰ চিনেমা ‘এনিমেল’৷ ‘এনিমেল’ হৈছে অৰ্জুন ৰেড্ডী আৰু কবীৰ সিঙৰ পাছত পৰিচালক হিচাপে সন্দীপৰ তৃতীয়খন চিনেমা। চিনেমাখনত বলীউড তাৰকা ৰণবীৰ কাপুৰে মুখ্য চৰিত্ৰত অভিনয় কৰিছে। আগৰ দুখন চিনেমাৰ দৰে এই চিনেমাখনে চৰম পুৰুষত্ব আৰু বিদ্বেষৰ ওপৰতো আলোকপাত কৰিছে বুলি চিনে-সমালোচকসকলৰ এটা বৃহৎ অংশই দাবী কৰিছে।
চিনেমাখন আৰু চিনেমাখনৰ বিষয়বস্তুক লৈ বিতৰ্ক হোৱা সত্ত্বেও ঋষি-পুত্ৰই ‘এনিমেল’ত কৰা কামৰ বাবে দৰ্শক আৰু সমালোচকৰ পৰা প্ৰশংসা অৰ্জন কৰিছে।
কেৱল সেয়াই নহয়, বিতৰ্কসত্ত্বেও এনিমেল-এ বক্স অফিচত যথেষ্ট ব্যৱসায় কৰিছে। অৱশ্যে, সেই সফলতাই প্ৰবীণ গীতিকাৰ জাভেদ আখটাৰক বাধা দিব নোৱাৰিলে। কেইদিনমান পূৰ্বে তেওঁ চিনেমাখনক ৰাজহুৱাভাৱে সমালোচনা কৰিছিল। আৰু এতিয়া বলীউডৰ অভিনেত্ৰী কংগনা ৰাণাৱটে ‘এনিমেল’ৰ বিষয়ে মুখ খুলিছে।
শেহতীয়াকৈ, তেওঁৰ চিনেমাখনৰ বক্স অফিচ ব্যৱসায়ৰ বিষয়ে কওঁতে, কংগনাই কৈছিল যে তেওঁৰ চিনেমাখনৰ ইচ্ছাকৃতভাৱে নেতিবাচক প্ৰচাৰ কৰা হৈছিল৷
কংগনাই দাবী কৰিছে যে কৰণ জোহৰৰ দৰে বলীউডৰ প্ৰভাৱশালী ব্যক্তিত্ব এই নেতিবাচক প্ৰচাৰৰ আঁৰত আছে। কিন্তু একে সময়তে অভিনেত্ৰীগৰাকী বলীউডৰ চিনেমাৰ শেহতীয়া প্ৰৱণতাকলৈও চিন্তিত। কংগনাই লিখিছিল, চিনেমাখনৰ চাৰিওফালে নেতিবাচক প্ৰচাৰৰ সৈতে মোকাবিলা কৰাটো অতি কঠিন। মই ইমানদিন ধৰি সংগ্ৰাম কৰি আছোঁ, কিন্তু এতিয়া আনকি দৰ্শকেও এনে চিনেমাৰ প্ৰশংসা কৰিছে, য’ত মহিলাসকলক সামগ্ৰী হিচাপে গণ্য কৰা হয়। যদিও কংগনাই ‘এনিমেল’ চিনেমাখনৰ নাম উল্লেখ কৰা নাছিল, তেওঁৰ মন্তব্যৰ পৰা এইটো স্পষ্ট যে তেওঁ প্ৰকৃততে সন্দীপৰ চিনেমাখনৰ বিষয়ে কথা পাতি আছিল। কংগনাই অভিনয় এৰি আন এটা বৃত্তিলৈ যোৱাৰ ইচ্ছাপ্ৰকাশ কৰিছিল।
Continue Reading
