নগালেণ্ড কাণ্ডঃ অৰ্ধ-সামৰিক বাহিনীৰ বিৰুদ্ধে আৰক্ষীৰ নিজাববীয়া গোচৰ

ডিজিটেল ডেস্ক: নগালেণ্ডৰ আপাৰ টিৰু অঞ্চলত সেনাবাহিনীৰ নিৰ্বিচাৰ গুলীচালনাৰ ঘটনাই দেশজুৰি চাঞ্চল্যৰ সৃষ্টি কৰিছে৷

এই ঘটনাৰ পাছতেই নগালেণ্ডৰ টিজিট আৰক্ষীয়ে শনিবাৰে নগালেণ্ডৰ মন জিলাৰ অটিঙ গাঁৱৰ ১৪গৰাকী নিৰীহ লোকক গুলীয়াই হত্যা কৰাৰ সন্দৰ্ভত ২১ কেন্দ্ৰীয় নিৰাপত্তা বাহিনী(পেৰামিলিটাৰী ফ’ৰ্চ)ৰ বিৰুদ্ধে এটা নিজাববীয়া গোচৰ ৰুজু কৰিছে৷ টিজিট আৰক্ষীৰ এই গোচৰত হত্যা, হত্যাৰ চেষ্টা আৰু এটা উমৈহতীয়া উদ্দেশ্যৰে এটা গোটত এটা কাৰ্য সংঘটিত কৰাৰ অভিযোগত গোচৰ পঞ্জীয়ন কৰা হৈছে৷ এজাহাৰখনত কোৱা হৈছে যে কমাণ্ডোসকলে গাঁওবাসীসকলক কামৰ পৰা তেওঁলোকৰ ঘৰলৈ লৈ যোৱা ব’লেৰ’ পিকআপ ভানখনত কোনো কাৰণ নোহোৱাকৈয়ে গুলীচালনা কৰিছিল৷ যাৰ ফলত অটিং গাঁৱৰ ১৪ গৰাকী লোকে প্ৰাণআহুতি দিয়াৰ লগতে বহুলোক গুৰুতৰভাৱে আহত হৈছিল। টিজিট আৰক্ষীৰ এজাহাৰখনত কোৱা হৈছে যে, ঘটনাটোৰ সময়ত কোনো আৰক্ষী নিৰ্দেশক নাছিল বা নিৰাপত্তা বাহিনীয়ে তেওঁলোকৰ অভিযানৰ বাবে আৰক্ষী নিৰ্দেশনা প্ৰদান কৰিবলৈ আৰক্ষী থানালৈ কোনোধৰণৰ অনুৰোধ কৰা নাছিল।

টিজিট আৰক্ষীয়ে ৰুজু কৰা নিজাববীয়া গোচৰৰ এজাহাৰখনত নিৰাপত্তা বাহিনীৰ উদ্দেশ্য হৈছে সাধাৰণ লোকক হত্যা আৰু আঘাত কৰা বুলি কোৱা হৈছে৷