নগালেণ্ডৰ পৰা আফস্পা প্ৰত্যাহাৰ : বিশেষ কমিটী গঠনেৰে কেন্দ্ৰই গ্ৰহণ কৰিব সিদ্ধান্ত

ডিজিটেল ডেস্ক : সামৰিক বাহিনীৰ বিশেষ ক্ষমতা আফস্পা আইনৰ বিৰুদ্ধে নগালেণ্ডত অব্যাহত থকা প্ৰৱল প্ৰতিবা়দৰ ওচৰত নমনীয় হোৱা দেখা গৈছে কেন্দ্ৰীয় চৰকাৰক। নগালেণ্ডৰ মন জিলাত সেনাৰ হাতত ১৪জনকৈ নিৰীহ লোক নিহত হোৱাৰ ঘটনাৰ পাছত এতিয়াও ৰাজ্যখনত সেনাবিৰোধী প্ৰৱল প্ৰতিবাদ অব্যাহত আছে। সেনাৰ বিৰুদ্ধে দল-সংগঠনে গ্ৰহণ কৰিছে অসহযোগ আন্দোলনৰ কাৰ্যসূচীও। কেৱল এয়াই নহয়, সামৰিক বাহিনীৰ বিশেষ ক্ষমতা আইনৰ বিৰুদ্ধে নগালেণ্ডৰ বিধানসভাত গ্ৰহণ কৰা হৈছে সৰ্বসন্মত প্ৰস্তাৱ। এনে নিৰন্তৰ বাধা তথা প্ৰতিৰোধৰ ওচৰত সেও মানি কেন্দ্ৰীয় চৰকাৰে এই আইন প্ৰত্যাহাৰ কৰা সম্পৰ্কত নতুনকৈ চিন্তা কৰিবলৈ বাধ্য হৈ পৰিছে। আফস্পা প্ৰত্যাহাৰ কৰা সন্দৰ্ভত এতিয়া কেন্দ্ৰই গঠন কৰিব এখন বিশেষ কমিটী।

নগালেণ্ডৰ মুখ্যমন্ত্ৰী নেইফিউ ৰিঅ’ই দেওবাৰে টুইটযোগে এইকথা সদৰি কৰে। ৰিঅ’ই কয় যে, কেন্দ্ৰীয় গৃহমন্ত্ৰী অমিত শ্বাহে আফস্পাৰ বিষয়টো অতি গুৰুত্বসহকাৰে গ্ৰহণ কৰিছে। এই আইন প্ৰত্যাহাৰ কৰাৰ বাবে কমিটী গঠন কৰা হ’ব আৰু কমিটীয়ে এই বিষয়টো সন্দৰ্ভত অধ্যয়ন কৰি পৰামৰ্শ আগবঢ়াব।

ৰাজ্য চৰকাৰৰ ফালৰ পৰা সকলো পক্ষকে শান্তি-সুস্থিৰতা বৰ্তাই ৰাখিবলৈ আহ্বান জনাইছোঁ। উল্লেখ্য যে, গৃহমন্ত্ৰী অমিত শ্বাহৰ অধ্যক্ষতাত অনুষ্ঠিত এই বৈঠকত অসমৰ মুখ্যমন্ত্ৰী হিমন্ত বিশ্ব শৰ্মাও উপস্থিত আছিল। অসমৰো একাংশ অঞ্চলত আফস্পা বলৱৎ হৈ থকাৰ পৰিপ্ৰেক্ষিতত মুখ্যমন্ত্ৰী ড০ শৰ্মাৰ উপস্থিতি তাৎপৰ্যপূৰ্ণ বিবেচিত হৈছে। উল্লেখ্য যে, এই আফস্পা প্ৰত্যাহাৰ কৰাৰ বাবে পৰিস্থিতি অধ্যয়ন কৰিবলৈ গঠন কৰিবলগীয়া কমিটীখনে ৪৫ দিনৰ ভিতৰত তেওঁলোকৰ প্ৰতিবেদন দিব লাগিব।