গুৱাহাটী উচ্চ ন্যায়ালয়ে নগাঁও জিলাৰ লুঠামাৰি সংৰক্ষিত বনাঞ্চলত বাস কৰি থকা বেদখলকাৰীসকলক এক গুৰুত্বপূৰ্ণ নিৰ্দেশনা জাৰি কৰিছে। আদালতে ৩০ দিনৰ ভিতৰত নিজৰ সামগ্ৰী আঁতৰাই বিকল্প বাসস্থানৰ ব্যৱস্থা কৰিবলৈ নিৰ্দেশ দিছে। নিৰ্দিষ্ট সময়সীমাৰ ভিতৰত যদি বেদখলকাৰীসকলে আদালতৰ নিৰ্দেশ পালন কৰাত ব্যৰ্থ হয়, তেন্তে প্ৰশাসনে তেওঁলোকক বনাঞ্চলৰ পৰা উচ্ছেদ কৰিবলৈ পদক্ষেপ ল'ব পাৰিব বুলিও ৰায়দানত উল্লেখ কৰা হৈছে।
উচ্চ ন্যায়ালয়ে লগতে নিৰ্দেশ দিছে যে ৩০ দিনৰ সময়সীমা উকলি যোৱাৰ পিছত অসম শক্তি বিতৰণ কোম্পানী লিমিটেড (APDCL)-এ উক্ত অঞ্চলৰ সকলো বিদ্যুৎ সংযোগ বিচ্ছিন্ন কৰিব লাগিব। ন্যায়াধীশ দেবাশীষ বৰুৱাৰ একক বিচাৰপীঠে একাংশ বেদখলকাৰীয়ে দাখিল কৰা এখন আবেদনৰ শুনানি গ্ৰহণ কৰি এই ৰায়দান প্ৰদান কৰে। আদালতে উল্লেখ কৰে যে আবেদনকাৰীসকলে ২০০৬ চনৰ অনুসূচিত জনজাতি আৰু অন্যান্য পৰম্পৰাগত বনবাসী (বন অধিকাৰ স্বীকৃতি) আইনৰ অধীনত 'বনবাসী অনুসূচিত জনজাতি' বা 'অন্যান্য পৰম্পৰাগত বনবাসী' হিচাপে নিজৰ অধিকাৰ প্ৰমাণ কৰাত বিফল হৈছে। আধাৰ কাৰ্ড, ভোটাৰ আইডি, নিৰ্বাচনী তালিকাত নাম, বিদ্যুৎ সংযোগ আৰু পঞ্চায়তৰ প্ৰমাণপত্ৰ আদি নথি-পত্ৰসমূহ আদালতে বন অধিকাৰৰ প্ৰমাণ হিচাপে গ্ৰহণ নকৰিলে।
আদালতে এইটোও পৰ্যবেক্ষণ কৰে যে সংৰক্ষিত বনাঞ্চলৰ ভূমি বিদ্যালয়, চিকিৎসালয়, আংগনৱাড়ী কেন্দ্ৰ, ন্যায্য মূল্যৰ দোকান, বিদ্যুৎ আৰু দূৰসংযোগ লাইন, পথ বা সামূহিক কেন্দ্ৰ আদি স্থাপনৰ বাবে ব্যৱহাৰ কৰিব নোৱাৰি, যদিহে কেন্দ্ৰীয় চৰকাৰে তেনে সুবিধাৰ বাবে ভূমি ব্যৱহাৰৰ অনুমতি নিদিয়ে। এই ৰায়দানে ৰাজ্যৰ সংৰক্ষিত বনাঞ্চলসমূহৰ সুৰক্ষাৰ ক্ষেত্ৰত এক স্পষ্ট বাৰ্তা প্ৰেৰণ কৰিছে।
Continue Reading
