ডিজিটেল ডেস্ক
সমগ্ৰ বিশ্বতে জনসংখ্যা বিস্ফোৰণ হোৱাৰ সমান্তৰালভাৱে দৈনিক বহু লোকৰ মৃত্যুুও হৈছে৷ দৈনিক নানা নতুন ৰোগত আক্ৰান্ত হৈছে বহু লোক৷ এই ৰোগসমূহৰ ভিতৰত অধিক প্ৰভাৱশালী হৈ উঠিছে কৰ্কট ৰোগ৷
শেহতীয়াকৈ প্ৰকাশ পোৱা এক তথ্য অনুসৰি ২০২০ বৰ্ষত বিশ্বৰ ৪৬ খন দেশৰ অধিকাংশ বাসিন্দাৰ মৃত্যুৰ মূল কাৰণ হৈছে যকৃতৰ কৰ্কট ৰোগ৷ কেৱল এইয়াই নহয়,অনাগত দিনত যকৃতৰ কৰ্কটত আক্ৰান্তৰ সংখ্যা বৃদ্ধি পাব বুলিও প্ৰকাশ কৰিলে এই সমীক্ষাই৷ সমীক্ষা অনুসৰি , অনাগত ২০ বছৰত যকৃতৰ কৰ্কটত আক্ৰান্তৰ হাৰ বৰ্তমানতকৈ ৫০ শতাংশ বৃদ্ধি হোৱাৰ সম্ভাৱনা আছে৷ চিকিৎসা বিজ্ঞানৰ এক পত্ৰিকাত এই তথ্য প্ৰকাশ পাইছে৷
এই একেখন পত্ৰিকাৰ তথ্য মতে,বিশ্বত দ্ৰুত হাৰত কৰ্কট আক্ৰান্তৰ সংখ্যা বৃদ্ধি পাইছে৷ উল্লেখযোগ্য যে, কৰ্কট ৰোগৰ মূল কাৰণসমূহো স্পষ্ট কৰিছে এই পত্ৰিকাখনে৷ পত্ৰিকাৰ তথ্য অনুসৰি সুৰাপান, অস্বাস্থ্যকৰ খাদ্য গ্ৰহণ, শৰীৰৰ ওজন বৃদ্ধিৰ ফলতো কোনো ব্যক্তি সহজেই কৰ্কট ৰোগত আক্ৰান্ত হ’ব পাৰে৷ইয়াৰোপৰি টাইপ ২ ডায়বেটিছো হ’ব পাৰে কৰ্কট ৰোগৰ কাৰক৷
“ইন্টাৰনেচনেল এজেন্সি ফৰ ৰিচাৰ্চ অন কেন্সাৰ”ৰ দ্বাৰা প্ৰকাশিত তথ্য মতে, যোৱা ২০২০ বৰ্ষত বিশ্বজুৰি প্ৰায় আঠ লাখ লোক যকৃতৰ কেন্সাৰত আক্ৰান্ত হৈছিল৷ ইয়াৰ ভিতৰত পূব এচিয়া আৰু উত্তৰ আফ্ৰিকাতে কেন্সাৰ আক্ৰান্ত লোকৰ সংখ্যা সৰ্বাধিক৷
আমি সততে গুৰুত্ব নিদিওঁ যদিও সৰু সৰু কাৰণতে এই ভয়াৱহ ৰোগ হ’ব পাৰে৷ উদাহৰণ স্বৰূপে নিদ্ৰাহীনতা, অত্যাধিক কৰ্মব্যস্ততাৰ বাবেও এই জটিল ৰোগ হ’ব পাৰে৷ প্ৰয়োজনতকৈ অধিক তেল-মছলা, চৰ্বিযুক্ত খাদ্য, মিঠা খাদ্য অধিক খোৱাৰ ফলতো যকৃতৰ ক্ষতি হোৱাৰ সম্ভাৱনা থাকে৷ গতিকে এই ৰোগৰ পৰা পৰিত্ৰাণ পাবলৈ সুস্থ প্ৰণালীৰে জীৱন যাপন কৰাটো অতি আৱশ্যক৷
