ডিজিটেল ডেস্কঃ খ্যাতিৰ শিখৰত থকাৰ পাছতো যেন কিবা এটা পোৱা নাই স্কাৰলেট জোহানছনে! হলিউডৰ আগশাৰীৰ অভিনেত্ৰীগৰাকীয়ে শেহতীয়াকৈ এনেধৰণেই এক আক্ষেপ ব্যক্ত কৰিছে।
স্কাৰলেটে শেহতীয়াকৈ মন্তব্য কৰিছে যে কিশোৰী বয়সৰ পৰাই তেওঁ অভিনয় কৰি আহিছে। হলিউডলৈ তেওঁ নিজৰ অভিনয় প্ৰতিভা প্ৰদৰ্শন কৰিবলৈ আহিছিল। কিন্তু অভিনয়ৰ সলনি তেওঁক এগাৰী সুন্দৰী নাৰী হিচাপেহে গণ্য কৰা হ’ল। অৰ্থাৎ তেওঁৰ গুণৰ সলনি ৰূপকহে সকলোৱে আঁকোৱালি ল’লে।
উল্লেখযোগ্য যে ইতিমধ্যে দুবাৰৰ অস্কাৰৰ মনোনয়ন লাভ কৰিছে স্কাৰলেটে। সমালোচকৰ দ্বাৰাও তীব্ৰভাৱে প্ৰশংসিত হৈ আহিছে অভিনেত্ৰীগৰাকী। হলিউডৰ অভিজ্ঞতাও কম নহয় তেওঁৰ। আছে ২৮ বছৰৰ অভিজ্ঞতা।
কিন্তু ইয়াৰ পাছতো তেওঁ আক্ষেপ কৰি কয় যে হলিউডত যিধৰণৰ চিনেমা কৰিবলৈ তেওঁ ইচ্ছা কৰি আহিছে, সেইধৰণৰ চিনেমাৰ অফাৰ লাভ কৰা নাই। তাৰ কাৰণ হৈছে হলিউডত প্ৰথমৰ পৰাই তেওঁক অভিনেত্ৰীৰ সলনি যৌনতাৰ দেৱী হিচাপে উপস্থাপন কৰা হৈ আহিছে। ফলস্বৰূপে অত্যধিক গ্লেমাৰাছ চৰিত্ৰতহে তেওঁক অভিনয়ৰ সুযোগ দিয়া হৈছে।
স্কাৰলেটে কয় যে তেওঁৰ পূৰ্বেও বহু অভিনেত্ৰীয়ে হলিউডত এই অভিজ্ঞতা লাভ কৰি আহিছে। ইয়াৰ মাজত অন্যতম মেৰিলীন মনৰো। সেইবাবেই চিনেমাৰ চৰিত্ৰ নিৰ্বাচন আৰু নিজৰ ভাৱমূৰ্তি নিৰ্মাণৰ ক্ষেত্ৰত সচেতন হৈ পৰিছে স্কাৰলেট।
উল্লেখযোগ্য যে স্কাৰলেটৰ বৰ্তমান বয়স ৩৭। কেইবাখনো জনপ্ৰিয় আৰু কালজয়ী চিনেমাত অভিনয়ৰ সুযোগ পোৱা স্কাৰলেটক বিশ্বৰ প্ৰভাৱশালী ব্যক্তিসকলৰ ভিতৰত অন্যতম হিচাপে জনা যায়।
Continue Reading
