ডিজিটেল ডেস্কঃ নিষিদ্ধ কৰা হ’ব পাৰে পাকিস্তানৰ প্ৰাক্তন প্ৰধানমন্ত্ৰী ইমৰাণ খানৰ ৰাজনৈতিক দল তেহৰিক-ই-ইনছাফ পাকিস্তান (পিটিআই)। দেশখনৰ প্ৰতিৰক্ষা মন্ত্ৰী খোৱাজা আছিফে মন্তব্য কৰিছে।
উল্লেখ্য যে প্ৰাক্তন প্ৰধানমন্ত্ৰী ইমৰাণ খানেও একে আশংকা কৰিছিল। তাৰপাছতে বুধবাৰে প্ৰতিৰক্ষা মন্ত্ৰী আছিফে কয় যে “ইমৰাণৰ দল তেহৰিক-ই-ইনছাফ পাকিস্তান (পিটিআই) নিষিদ্ধ কৰাৰ চিন্তা চলি আছে। দেশৰ বুকুত আঘাত হানিছে পিটিআইয়ে। আগতে কেতিয়াও এনেকুৱা হোৱা নাছিল। এইটো কোনো কাৰণতে গ্ৰহণযোগ্য নহয়।”
দেশখনৰ প্ৰতিৰক্ষা মন্ত্ৰী আছিফৰ এই মন্তব্যই পাকিস্তানত আকৌ এবাৰ অশান্তিৰ জুই জ্বলাব বুলি ধাৰণা কৰা হৈছে। ইমৰাণ খানক গ্ৰেপ্তাৰ কৰাৰ পিছৰে পৰা পাকিস্তানত কাৰ্যতঃ গৃহযুদ্ধ সদৃশ পৰিস্থিতিৰ সৃষ্টি হৈছে।
শেহতীয়াকৈ ইমৰাণ খানে নিজৰ টুইটাৰ হেণ্ডেলত লিখিছে, “প্ৰায় ৭ হাজাৰ পিটিআই সমৰ্থকক গ্ৰেপ্তাৰ কৰা হৈছে। হিংসাৰ আঁৰত কোন আছে তদন্ত নকৰাকৈয়ে আমাৰ সমৰ্থক, নেতৃত্ব আৰু মহিলাসকলক জেলত ভৰোৱা হৈছে। আমাৰ দলক নিষিদ্ধ কৰাৰ ষড়যন্ত্ৰ।”
উল্লেখ্য যে ইমৰাণ খান এসময়ত পাকিস্তান সেনাৰ পোষ্টাৰ বয় আছিল। সেই সমীকৰণটো সলনি হোৱাৰ লগে লগে পাকিস্তানক ক্ৰিকেট বিশ্বকাপৰ উপহাৰ দিয়া ‘কেপ্তেইন’জন সেনাৰ চকুত শত্ৰু হৈ পৰিছে।
