ডিজিটেল ডেস্কঃ সাম্প্ৰদায়িক সম্প্ৰীতি তথা শান্তি বিঘ্নিত কৰাৰ চেষ্টা কৰিলেই কৰ্ণাটকত নিষিদ্ধ হ’ব আৰ এছ এছ। এই সকীয়নি প্ৰদান কৰিছে এগৰাকী কংগ্ৰেছ নেতাই।
চিত্তপুৰ বিধানসভাৰ বিধায়ক তথা কংগ্ৰেছ নেতা প্ৰিয়াংক খৰ্গেই এই সকীয়নি প্ৰদান কৰিছে। এক টুইট যোগে খৰ্গেই কয়, “যদি কোনো ধৰ্মীয় বা ৰাজনৈতিক সংগঠনে কৰ্ণাটকত শান্তি বিঘ্নিত কৰিবলৈ, সাম্প্ৰদায়িক ঘৃণা বিয়পাই দিবলৈ চেষ্টা কৰে, তেতিয়া আমাৰ চৰকাৰে সেই সংগঠনক আইনগতভাৱে মোকাবিলা কৰিবলৈ বা নিষিদ্ধ কৰিবলৈ কুণ্ঠাবোধ নকৰে। সেয়া লাগিলে আৰ এছ এছ বা আন কোনো সংগঠন হওক।”
লক্ষণীয়ভাৱে, কৰ্ণাটক বিধানসভা নিৰ্বাচনৰ পূৰ্বে নিৰ্বাচনী ইস্তাহাৰত আন এক হিন্দুত্ববাদী সংগঠন বজৰং দলকো নিষিদ্ধ কৰাৰ প্ৰতিশ্ৰুতি দিছিল কংগ্ৰেছে। কংগ্ৰেছৰ এই নিৰ্বাচনী ইস্তাহাৰক লৈ ব্যাপক বিতৰ্কৰ সৃষ্টি হৈছিল।
Continue Reading
