নিৰ্বাচনী ইস্তাহাৰত আৰ্থিক সাহায্যৰ প্ৰতিশ্ৰুতি দিয়াটো দুৰ্নীতি নহয়: উচ্চতম ন্যায়ালয়

২০২৩ চনত কৰ্ণাটকৰ বিধানসভা নিৰ্বাচনৰ সময়ত কংগ্ৰেছৰ ইস্তাহাৰত ৰাইজক আৰ্থিক সাহায্য দিয়াৰ প্ৰতিশ্ৰুতি দুৰ্নীতিৰ এক স্বৰূপ  বুলি অভিযোগ উত্থাপন কৰি উচ্চতম ন্যায়ালয়ত গোচৰ ৰুজু কৰা হৈছিল। উচ্চতম ন্যায়ালয়ত ন্যায়াধীশ সূৰ্যকান্ত আৰু ন্যায়াধীশ কে ভি বিশ্বনাথনৰ বিচাৰপীঠে মঙলবাৰে  এই আবেদন খাৰিজ কৰি কয় যে কোনো ৰাজনৈতিক দলে ইস্তাহাৰত দিয়া প্ৰতিশ্ৰুতিক  দুৰ্নীতি হিচাপে চাব নোৱাৰি। ন্যায়াধীশদ্বয়ে  কয় যে ইস্তাহাৰত ৰাজনৈতিক দলে দিয়া প্ৰতিশ্ৰুতি দুৰ্নীতি নহয়।   ৰাইজক প্ৰত্যক্ষ বা পৰোক্ষ সহযোগিতাৰ কথাটো কোনো দলৰ প্ৰাৰ্থীয়ে কৰা দুৰ্নীতিৰ উদাহৰণ নহয়। আবেদনকাৰীৰ এনে চিন্তাধাৰা বেয়া আৰু গ্ৰহণযোগ্য নহয়।''

কৰ্ণাটকৰ চামৰাপেট বিধান সভা সমষ্টিৰ এজন ভোটাৰে ইস্তাহাৰত দিয়া প্ৰতিশ্ৰুতিৰ বাবে কেতবোৰ  অভিযোগ উত্থাপন কৰি বিজয়ী প্ৰাৰ্থী বি জেড জামিৰৰ ফলাফল বাতিল কৰিবলৈ কৰ্ণাটক উচ্চ ন্যায়ালয়ত আবেদন জনাইছিল। আবেদনত কোৱা হৈছিল যে কৰ্ণাটক কংগ্ৰেছে ২৩ সংখ্যক বিধানসভা নিৰ্বাচনৰ ইস্তাহাৰত ভোটাৰক আৰ্থিক সাহায্য প্ৰদান কৰাৰ প্ৰতিশ্ৰুতি দিছিল। যিটো দুৰ্নীতিৰ উদাহৰণ। সেই যুক্তি অৱশ্যে উচ্চ ন্যায়ালয়ে নাকচ কৰিলে। উচ্চ ন্যায়ালয়ে ৰায় দিয়ে যে কংগ্ৰেছে ইস্তাহাৰত যি পাঁচটা নিশ্চয়তা প্ৰকাশ কৰিছে, সেই পাঁচটা নিশ্চয়তাক সামাজিক উন্নয়নৰ নীতি হিচাপে চাব পাৰি। 

অৰ্থনৈতিক দৃষ্টিকোণৰ পৰা সেইবোৰক কিমানখিনি উপলব্ধি কৰিব পৰা যায় সেয়া সম্পূৰ্ণ বেলেগ কথা। কোনো বিৰোধী ৰাজনৈতিক দলে ক’ব পাৰে যে এনে প্ৰকল্পই ৰাজ্যৰ অৰ্থনীতিত বিৰূপ প্ৰভাৱ পেলাব  আৰু ইয়াক ভুল নীতি বুলিও চিহ্নিত কৰা   হ’ব পাৰে। কিন্তু ইয়াক কোনো কাৰণতে দুৰ্নীতিৰ নিদৰ্শন হিচাপে চাব নোৱাৰি। আজি উচ্চতম ন্যায়ালয়েও কৰ্ণাটক উচ্চ ন্যায়ালয়ৰ একেটা ৰায়কে স্বীকৃতি দিলে।উচ্চতম ন্যায়ালয়ৰ ৰায়দানৰ পিছত কংগ্ৰেছ নেতা জয়ৰাম ৰমেশে কয় যে বিদায়ী প্ৰধানমন্ত্ৰীৰ বাবে এয়া এক আঘাত। কংগ্ৰেছৰ মুখপাত্ৰ মনিকম ঠাকুৰৰ ভাষাত, "এয়া কংগ্ৰেছৰ ইস্তাহাৰত সমতাৰ প্ৰকল্পৰ স্বীকৃতি" তেওঁ দাবী কৰে যে বিজেপিৰ সকলো ভিত্তিহীন অভিযোগৰ মাজতো কংগ্ৰেছ সামাজিক ন্যায়ৰ লক্ষ্যত দায়বদ্ধ।