ডিজিটেল ডেস্কঃ কৰ্ণাটকৰ শিক্ষানুষ্ঠানত ছাত্ৰীয়ে হিজাব পৰিধান কৰি যোৱাকলৈ ৰাজ্য খনত তীব্ৰ প্ৰতিক্ৰিয়াৰ সৃষ্টি হৈছিল৷ সেই সময়ত ৰাজ্য খনত শাসনত থকা বিজেপি চৰকাৰে শিক্ষানুষ্ঠানত হিজাব নিষিদ্ধ কৰাৰ পিছতে দেশৰ কেইবাখনো ৰাজ্যত প্ৰতিবাদ হৈছিল৷
কৰ্ণাটকত ১০ মে'ত অনুষ্ঠিত বিধানসভা নিৰ্বাচনৰ প্ৰচাৰৰ সময়তে কংগ্ৰেছে কৈছিল যে দলটোৱে ৰাজ্যখনত ক্ষমতা দখল কৰিলেই পূৰ্বৰ বিজেপি চৰকাৰে হিজাবৰ ওপৰত আৰোপ কৰা নিষেধাজ্ঞা প্ৰত্যাহাৰ কৰিব। শেহতীয়াকৈ সেই নিৰ্বাচনী প্ৰতিশ্ৰুতি পালন কৰিবলৈ কংগ্ৰেছ নেতৃত্বাধীন চৰকাৰ খন অগ্ৰসৰ হোৱা বুলি বিশেষ সূত্ৰই প্ৰকাশ কৰিছে৷ কৰ্ণাটকৰ উপ-মুখ্যমন্ত্ৰী ডি কে শিৱকুমাৰেও সেই একেই ইংগিতে দিছে৷
জানিব পৰা মতে শীঘ্ৰে কেবিনেটত হিজাৰ বিৰুদ্ধে থকা নিষেধাজ্ঞা প্ৰত্যাহাৰৰ বিষয়টোত সিদ্ধান্ত লোৱা হ’ব । উল্লেখ্য কৰ্ণাটকত তদানীন্তন বিজেপি নেতৃত্বাধীন চৰকাৰে ২০২২ চনৰ ৫ ফেব্ৰুৱাৰীত শিক্ষানুষ্ঠানত ছাত্ৰীসকলক হিজাব পৰিধান কৰাত নিষেধাজ্ঞা আৰোপ কৰিছিল।
ৰাজ্য চৰকাৰৰ এই সিদ্ধান্তক প্ৰত্যাহ্বান জনাই বহু মুছলমান সম্প্ৰদায়ৰ ছাত্ৰীয়ে কৰ্ণাটক উচ্চ ন্যায়ালয়ত আবেদন দাখিল কৰিছিল।কৰ্ণাটক উচ্চ ন্যায়ালয়ে ২০২২ চনৰ ১৫ মাৰ্চত এই আবেদন খাৰিজ কৰিছিল। হিজাব ইছলামধৰ্মৰ অপৰিহাৰ্য ধৰ্মীয় অনুশীলনৰ অংশ নহয় বুলি উল্লেখ কৰি উচ্চ ন্যায়ালয়ে কৰ্ণাটক ৰাজ্য চৰকাৰৰ সপক্ষত ৰায় দিছিল৷ ফলত শিক্ষানুষ্ঠানত হিজাব পৰিধান কৰাটো ৰাজ্য খনত নিষিদ্ধ হৈছিল ৷
Continue Reading
