ডিজিটেল ডেস্কঃ টাইটানিকৰ ধ্বংসাৱশেষ চাবলৈ গৈ এতিয়া বিপদত পৰিছে চাৰিগৰাকী পৰ্যটকৰ লগতে এগৰাকী ছাবমেৰিনৰ চালক। আটলাণ্টিকৰ গভীৰ বুকুত আবদ্ধ হৈ পৰা ছাবমেৰিন খনৰ উদ্ধাৰৰ আশা প্ৰায় ক্ষীণ হৈ পৰিছে।ছাবমেৰিন টাইটানত এতিয়া মজুত আছে মাত্ৰ ৩০ ঘণ্টাৰ বাবে অক্সিজেন।
সন্ধানহীন হোৱা ছাবমেৰিনখনৰ সন্ধান উলিয়াবলৈ সক্ষম হোৱা নাই উদ্ধাৰকাৰীৰ দলবোৰে। আমেৰিকা যুক্তৰাষ্ট্ৰৰ উপকূলৰক্ষী বাহিনী আৰু কানাডাৰ এটা যুটীয়া উদ্ধাৰকাৰীৰ দলে ছাবমেৰিনখন বিচাৰি উলিয়াবলৈ যথাসাধ্য চেষ্টা চলাই আছে। ফৰাচী ছাবমেৰিনোএই অভিযানত জড়িত হৈ পৰিছে।
অনুমান কৰা হৈছে যে ছাবমেৰিনখন সাগৰৰ পৰা প্ৰায় ১২,৫০০ ফুট তলত আৱদ্ধ হৈ আছে। দেওবাৰে পুৱা ৯.৪৫ বজাত টাইটানৰ সৈতে সম্পৰ্ক বিচ্ছিন্ন হৈ পৰিছিল। এতিয়া যুদ্ধকালীন তৎপৰতাৰে চলি আছে উদ্ধাৰৰ চেষ্টা।ছাবমেৰিন টাইটানে নিউফাউণ্ডলেণ্ডৰ ছেইণ্ট জনছৰ পৰা যাত্ৰা কৰিছিল। ছাবমেৰিনখনত জৰুৰীকালীন অৱস্থাত প্ৰয়োজন হ’ব পৰাকৈ ৯৬ ঘণ্টাৰ অক্সিজেন মজুত আছিল।
বিশেষজ্ঞসকলে ধাৰণা কৰিছে যে ইতিমধ্যে যথেষ্ট অক্সিজেন ব্যৱহাৰ হৈছে। আনুমানিক ৩০ ঘণ্টাৰ অক্সিজেনহে ছাবমেৰিন খনত থাকিব পাৰে। অৰ্থাৎ ৩০ ঘণ্টাৰ আগতেই ছাবমেৰিনত খনত থকা লোকসকলক উদ্ধাৰ কৰিব নোৱাৰিলে তেওঁলোকৰ জীৱন বচোৱা সম্ভৱ নহ’ব। ৫৯ বছৰীয়া ব্ৰিটিছ কোটিপতি ব্যৱসায়ী হামিশ হাৰ্ডিঙো ছাবমেৰিনখনত আছে।
Continue Reading
