ডিজিটেল ডেস্কঃ মহাৰাষ্ট্ৰত সংঘটিত হৈছে এক ভয়ংকৰ দুৰ্ঘটনা। নিয়ন্ত্ৰণ হেৰুৱাই এখন ট্ৰাকে ধাবাত সোমাই যোৱাৰ ফলত কমেও ১৫ জন লোক নিহত হোৱাৰ লগতে কুৰি জনৰো অধিক লোক আহত হৈছে।মহাৰাষ্ট্ৰৰ মুম্বাই-আগ্ৰা ঘাইপথত সংঘটিত হৈছে এই দুৰ্ঘটনা।
মঙলবাৰে দুপৰীয়া মহাৰাষ্ট্ৰৰ ধুলে জিলাৰ পালচনাৰ গাঁৱত দুৰ্ঘটনাটো সংঘটিত হয়। প্ৰত্যদৰ্শীয়ে প্ৰকাশ কৰা মতে ট্ৰাকখনে তীব্ৰ গতিত যাত্ৰা কৰি আছিল। ট্ৰাকখনে প্ৰথমে ৰাজপথত থকা চাৰিখন বাহনক খুন্দা মাৰি ৰাজপথৰ কাষত থকা এখন ধাবাত সোমাই যায়।দুপৰীয়াৰ সময় হোৱা বাবে সেই সময়ত বহুলোকে ধাবাৰ ভিতৰত আহাৰ খাই আছিল।
কিছুসংখ্যক লোকে ধাবাৰ কাষৰ বাছ ষ্টপত বাছৰ বাবে অপেক্ষা কৰি আছিল। ট্ৰাকৰ খুন্দাত কমেও ১৫ জন লোকৰ মৃত্যু ঘটে। নিহতৰ সংখ্যা আৰু অধিক বৃদ্ধি পাব পাৰে। উল্লেখ্য পালচনাৰ গাওঁখন মুম্বাইৰ পৰা ৩০০ কিলোমিটাৰ দূৰৈত অৱস্থিত । এজন আৰক্ষী বিষয়াই কয় যে ট্ৰাকখন মধ্য প্ৰদেশৰ পৰা আহি আছিল। গন্তব্যস্থান আছিল ধুলি। প্ৰাথমিক অনুসন্ধানত প্ৰকাশ পাইছিল যে ট্ৰাকখন দ্ৰুত গতিত গৈ আছিল। হঠাতে ট্ৰাক খনৰ ব্ৰেক বিফল হৈ পৰে আৰু দুৰ্ঘটনাত পতিত হয়।
দুৰ্ঘটনাটোত আহতসকলক ততাতৈয়াকৈ শিৰপুৰ আৰু ধুলেৰ চিকিৎসালয়লৈ লৈ যোৱা হয়। মৃতদেহমৰণোত্তৰ পৰীক্ষাৰ বাবে প্ৰেৰণ কৰা হৈছে।
Continue Reading
