ডিজিটেল ডেস্কঃ পুত্ৰৰ জন্মদিনৰ দিনাই মাতৃৰ মৃত্যু। নিয়তিৰ কি যে বিধান। আনন্দৰ ক্ষণ মুহূৰ্ততে সলনি হল বেদনালৈ। গুজৰাটৰ ভালছাদ জিলাত সংঘটিত হৈছে এক বেদনাদায়ক ঘটনা। য'ত পুত্ৰৰ জন্মদিনৰ পাৰ্টিত ব্যস্ত হৈ থাকোতেই হাৰ্ট এটেকত আক্ৰান্ত হৈ মাতৃৰ মৃত্যু হয়। এই ঘটনা ওচৰতে স্থাপন কৰা চিচিটিভি কেমেৰাত বন্দী হৈছে। পাঁচ বছৰীয়া পুত্ৰৰ জন্মদিনৰ পাৰ্টি উপভোগ কৰি আছিল পৰিয়ালটোৱে।
গৌৰিকৰ ৫ বছৰীয়া জন্মদিনত অহৰহ আলহীৰ সোঁত বৈ আছিল। গৌৰিকৰ মাতৃ আৰু পিতৃ জন্মদিনৰ কামতে ব্যস্ত আছিল। হঠাতে মাতৃ বাগৰি পৰাত মানুহে তেওঁক তুলি লৈ চিকিৎসালয়লৈ লৈ যায়। পৰীক্ষাৰ অন্তত চিকিৎসকে তেওঁক মৃত বুলি ঘোষণা কৰে। পৰিয়ালটোৰ সুখৰ পৰিৱেশ শোকলৈ পৰিণত হ’ল।
চিচিটিভিৰ ফুটেজত দেখা গৈছে যে ডিজেত পৰিয়ালৰ লোক আৰু আত্মীয়ই নাচি আছিল। তেনেতে মহিলাগৰাকীয়ে স্বামীৰ কান্ধত মূৰটো থৈ তললৈ বাগৰি পৰে। লৰালৰিকৈ তেওঁক হাস্পতাললৈ লৈ যোৱা হয় যদিও চিকিৎসকে তেওঁৰ হাৰ্ট এটেক হৈ মৃত্যু হোৱা বুলি কয়।
উল্লেখ্য যে যোৱা কেইবছৰমানৰ পৰা দেশত হৃদৰোগীৰ সংখ্যা বৃদ্ধি পাইছে। ৰাস্তাত খোজ কঢ়াৰ সময়ত, নাচি থকাৰ সময়ত বা জিমত ৱৰ্কআউট কৰাৰ সময়ত মানুহৰ হাৰ্ট এটেক হৈছে। আগতে ৬০-৬৫ বছৰ বয়সত হাৰ্ট এটেক হৈছিল যদিও শেহতীয়া বছৰবোৰত দেখা গৈছে যে এতিয়া ২০-২২ বছৰৰ পৰা ৩৫-৪০ বছৰ বয়সৰ ভিতৰৰ লোকৰ ক্ষেত্ৰত এনেকুৱা বেছিকৈ হৈছে।
Continue Reading
