ডিজিটেল ডেস্কঃ এক ভয়ংকৰ পথ দুৰ্ঘটনাত মৃত্যুক সাবটি ল’লে জনপ্ৰিয় মালায়ালাম অভিনেতা কোল্লাম সুধিয়ে। এই দুঃসংবাদ প্ৰকাশ পোৱাৰ পাছতে সমগ্ৰ মালায়ালাম ছবিজগতত গভীৰ শোকৰ ছাঁ পৰিছে।
সোমবাৰে কেৰালাৰ থ্ৰিছুৰত সংঘটিত হৈছে এই পথ দুৰ্ঘটনা। অভিনেতাগৰাকীয়ে যাত্ৰা কৰা বাহনখনে নিয়ন্ত্ৰণ হেৰুৱাই বিপৰীত দিশৰ পৰা অহা এখন ট্ৰাকত প্ৰচণ্ড জোৰে খুন্দা মাৰে। ইয়াৰ ফলত থিতাতে মৃত্যু ঘটে কোল্লাম সুধিৰ।
এই পথ দুৰ্ঘটনাত তেওঁৰ সৈতে থকা আন ৩ জন লোক গুৰুতৰভাৱে আহত হয়। সোমবাৰে পুৱা প্ৰায় ৪.৩০ বজাত থ্ৰিছুৰৰ কাইপামংগলামৰ সমীপত এই দুৰ্ঘটনা সংঘটিত হয়। ঘটনাস্থলীত আৰক্ষীৰ দল উপস্থিত হৈ আহত সকলক চিকিৎসালয়লৈ প্ৰেৰণ কৰে আৰু কোল্লাম সুধিৰ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে। মৃত্যুৰ সময়ত কোল্লাম সুধিৰ বয়স আছিল ৩৯ বছৰ।
কোল্লাম সুধি বিগত প্ৰায় এটা দশক ধৰি মালায়লম ছবিৰ সৈতে জড়িত হৈ আছিল। ছবিজগতৰ লগতে সৰুপৰ্দাৰো জনপ্ৰিয় অভিনেতা আছিল কোল্লাম সুধি। তেওঁ একাধিক ছুটি ছবি পৰিচালনাও কৰিছে।
অভিনেতাগৰাকীৰ এনে কৰুণ অকাল মৃত্যুত কেৰালাৰ মুখ্যমন্ত্ৰী পিনাৰায় বিজয়নে শোকপ্ৰকাশ কৰে। মালায়ালাম ছবিজগতৰ বহু তাৰকাই কোল্লাম সুধিৰ মৃত্যুত শ্ৰদ্ধাঞ্জলি জ্ঞাপন কৰিছে।
Continue Reading
