নতুন সংসদ ভৱন উদ্বোধন কৰিব লাগে ৰাষ্ট্ৰপতিয়ে, কিন্তু ৰাষ্ট্ৰপতিক আমন্ত্ৰণেই জনোৱা হোৱা নাই অনুষ্ঠানলৈ! বিৰোধীৰ দাবী

 কিন্তু উদ্বোধন কৰাটো বাদেই ,ৰাষ্ট্ৰপতিক উক্ত অনুষ্ঠানলৈ আমন্ত্ৰণেই জনোৱা হোৱা নাই বুলি কংগ্ৰেছে অভিযোগ কৰিছে। কংগ্ৰেছৰ সভাপতি মল্লিকাৰ্জুন খাৰ্গেই মোদী চৰকাৰক এইবুলি  প্ৰশ্ন কৰিছে  যে এই উদ্বোধন প্ৰধানমন্ত্ৰীৰ পৰিৱৰ্তে ৰাষ্ট্ৰপতিক  কিয় কৰিবলৈ মতা হোৱা নাই? তেওঁ লগতে অভিযোগ কৰে যে বিজেপিয়ে  কেৱল নিৰ্বাচনী কাৰণত দলিত আৰু জনজাতীয় সম্প্ৰদায়ৰ পৰা ৰাষ্ট্ৰপতি বাছনি কৰিছিল।

 বিৰোধীয়ে লগতে কয় যে প্ৰাক্তন ৰাষ্ট্ৰপতি ৰামনাথ কোবিন্দক নতুন সংসদৰ আধাৰশিলা স্থাপন অনুষ্ঠানলৈ আমন্ত্ৰণ জনোৱা হোৱা নাছিল। এতিয়া ভাৰতৰ ৰাষ্ট্ৰপতি দ্ৰৌপদী মুৰ্মুক নতুন সংসদ ভৱনৰ উদ্বোধনৰ বাবে আমন্ত্ৰণ জনোৱা হোৱা নাই। ৰাষ্ট্ৰপতিয়ে চৰকাৰ, বিৰোধী আৰু প্ৰতিজন নাগৰিকক সমানে প্ৰতিনিধিত্ব কৰে। তেওঁ ভাৰতৰ প্ৰথম নাগৰিক। যদি তেওঁ উদ্বোধন কৰে, ই গণতান্ত্ৰিক মূল্যবোধ আৰু সাংবিধানিক মৰ্যাদাৰ প্ৰতি চৰকাৰৰ প্ৰতিশ্ৰুতিৰ প্ৰতীক হ'ব বুলিও বিৰোধীয়ে কয়। 

উল্লেখ্য  ৯৭১ কোটি টকা ব্যয়ৰে নিৰ্মাণ আৰম্ভ কৰা   সংসদ ভৱনৰ বাবে নিৰ্মাণ ব্য়য়  ২২৯ কোটি টকা অতিৰিক্তভাৱে আৱণ্টন দি নিৰ্মাণ ব্যয় সৰ্বমুঠ ১,২৫০ কোটি টকা কৰা হৈছিল৷   সংসদ ভৱন নিৰ্মাণৰ দায়িত্ব লাভ কৰিছে টাটা গ্ৰুপে ৷চাৰিমহলীয়া নতুন সংসদ ভৱনটো ১৩ একৰ ভূমিত নিৰ্মাণ কৰা হৈছে।ৰাষ্ট্ৰীয় সংবাদ মাধ্যমত প্ৰকাশিত বাতৰি অনুসৰি প্ৰধানমন্ত্ৰী  নৰেন্দ্ৰ মোদীয়ে চলিত মাহতে  নতুন সংসদ ভৱন উদ্বোধন কৰিবলৈ সাজু হৈছে। যদি সকলো ঠিকে থাকে, সংসদৰ আগন্তুক অধিৱেশন নতুন সংসদ ভৱনতে অনুষ্ঠিত হ'ব।

 কেন্দ্ৰৰ মোদী চৰকাৰে ২৬ মে'ত ন বছৰ সম্পূৰ্ণ কৰিব। মোদীয়ে তেওঁৰ চৰকাৰৰ বাৰ্ষিকী উদযাপনৰ বাবে খৰখেদাকৈ নতুন সংসদ ভৱন উদ্বোধন কৰিবলৈ সাজু হৈছে বুলি সেয়ে ধাৰণা কৰা হৈছে। ২০২০ চনৰ ডিচেম্বৰ মাহত প্ৰধানমন্ত্ৰী নৰেন্দ্ৰ মোদীয়ে কেন্দ্ৰীয় ভিষ্টা প্ৰকল্পৰ অধীনত নতুন সংসদ ভৱনৰ আধাৰশিলা স্থাপন কৰিছিল। ১,২২৪ আসনৰ সংসদ ভৱনটো ইতিমধ্যে প্ৰায় নিৰ্মাণ হৈ উঠিছে।সংসদ ভৱনৰ ভিতৰৰ ফটোও মুকলি কৰা হৈছে। নতুন সংসদ ভৱনৰ পুথিভঁৰালৰ পৰা সভাকক্ষলৈকে সকলো ঠাইতে অত্যাধুনিক প্ৰযুক্তি ব্যৱহাৰ কৰা হৈছে। নতুন সংসদ ভৱনত এটা কোঠা আছে, য'ত ভাৰতীয় সংবিধানৰ পাণ্ডুলিপি ৰখা হৈছে আৰু এই কোঠাটো অত্যাধুনিক উপায়েৰে সজ্জিত কৰা হৈছে। নতুন সংসদ ভৱনত যাতে বিকলাঙ্গ লোকসকলে মুক্তভাৱে চলাচল কৰিব পাৰে তাৰ ব্যৱস্থাও কৰা হৈছে।

 নতুন সংসদ ভৱনৰ প্ৰতিটো কোণ দেশৰ বিভিন্ন ৰাজ্যৰ শিল্পকৰ্মেৰে সজোৱা বুলি জানিব পৰা গৈছে। নতুন সংসদত তিনি খন প্ৰৱেশদ্বাৰ আছে। জ্ঞানৰ দুৱাৰ, শক্তিৰ দুৱাৰ, আৰু কাৰ্যৰ দুৱাৰ। সাংসদ আৰু ভিআইপিসকলৰ বাবেও বিশেষ দুৱাৰ থাকিব। প্ৰধানমন্ত্ৰী নৰেন্দ্ৰ মোদীয়ে তেওঁৰ চৰকাৰৰ নৱম বাৰ্ষিকীত লোকসভা নিৰ্বাচনৰ ৰণশিঙা বজাব বিচাৰে। এয়া নতুন সংসদ ভৱনৰ উদ্বোধনৰ দ্বাৰাই আৰম্ভ হ'ব বুলি বহুতে চৰ্চা কৰিছে।