ডিজিটেল ডেস্কঃ নতুনকৈ গাড়ী চলাবলৈ শিকাটোৱেই কাল হ'ল এহাল পিতা-পুত্ৰৰ। নতুনকৈ গাড়ী শিকি থকা পুত্ৰই গাড়ীৰ ওপৰত নিয়ন্ত্ৰণ হেৰুৱাই পেলোৱাত পথৰ দাঁতিৰ কালভাৰ্টত প্ৰচণ্ড জোৰে খুন্দা মাৰে। যাৰ ফলত কৰুণ মৃত্যুক সাৱটি লয় পিতা-পুত্ৰই।
বৃহস্পতিবাৰে পুৱা এই শোকাবহ দুৰ্ঘটনা সংঘটিত হয় তেলেংগানাৰ নালগোণ্ডাৰ উপকণ্ঠ অঞ্চলৰ ৩৬৫ নং ৰাষ্ট্ৰীয় ঘাইপথত। দুৰ্ঘটনাত নিহত পিতা-পুত্ৰহালক বি ৰাজেশ প্ৰভু (৬৫) আৰু আৰ স্বামীনাথ (১৯) বুলি চিনাক্ত কৰা হৈছে। এই পথ দুৰ্ঘটনাত পিতৃ-পুত্ৰৰ থিতাতে মৃত্যু হয়।
ঘটনা অনুসৰি জানিব পৰা মতে, জংগাঁও নিৱাসী পিতা-পুত্ৰই নিজৰ চাৰিচকীয়া গাড়ীৰে পুৱা কোনো কামত হায়দৰাবাদ অভিমুখে গৈ আছিল। যোৱাৰ পৰত গাড়ীখন চলাইছিল নতুনকৈ গাড়ী চলাবলৈ শিকা স্বামীনাথে।
যাৰ বাবে যুৱকজনে গাড়ীৰ ওপৰত নিয়ন্ত্ৰণ হেৰুৱাই পেলাই আৰু পথৰ দাঁতিৰ কালভাৰ্টত প্ৰচণ্ড জোৰে খুন্দা মাৰে। এই দুৰ্ঘটনাত পিতা-পুত্ৰ দুয়োৰে থিতাতে মৃত্যু ঘটে। স্থানীয় লোকে আৰক্ষীক খবৰ দিয়াত ঘটনাস্থলীত আৰক্ষীৰ দল উপস্থিত হয় আৰু মৃতদেহ দুটা উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে।
ঘটনা সন্দৰ্ভত এটা গোচৰ ৰুজু কৰি তদন্ত আৰম্ভ কৰিছে আৰক্ষীয়ে। এই ঘটনাত অঞ্চলজুৰি শোকৰ ছাঁ পৰিছে।
Continue Reading
