ডিজিটেল ডেস্কঃ বেটী বচাও,বেটী পঢ়াও৷দেশৰ মহিলাসকলক শিক্ষিত আৰু সৱল কৰি তোলাৰ স্বাৰ্থত চৰকাৰে গ্ৰহণ কৰা বিশেষ পদক্ষেপ৷কিন্তু এই আঁচনি অথবা শ্ল’গানসমূহৰ দ্বাৰা মহিলাসকলৰ সামাজিক উত্তৰণ হৈছেনে?নে এতিয়াও ঘৰুৱা হিংসাত পিষ্ট হৈ মহিলাসকলে হেৰুৱাইছে নিজৰ জীয়াই থকাৰ ন্যূনতম অধিকাৰ৷শুকুৰবাৰে আৰক্ষীয়ে জনোৱা মতে, উত্তৰ প্ৰদেশৰ হাপুৰত এগৰাকী ২৩ বছৰীয়া অবিবাহিত মহিলাক গৰ্ভৱতী বুলি গম পোৱাৰ পাছত পৰিয়ালৰ লোকে অগ্নিসংযোগ কৰে।
নৱাদা খুৰদ গাঁৱত সংঘটিত হৈছে এই ঘটনা। শৰীৰত ৭০ শতাংশতকৈ অধিক জ্বলাৰ ফলত সংকটজনক অৱস্থাত থকা মহিলাগৰাকীক চিকিৎসাৰ বাবে আন এখন চিকিৎসালয়লৈ প্ৰেৰণ কৰা হৈছে৷ইতিমধ্যে ভুক্তভোগীগৰাকীৰ মাতৃ আৰু ভাতৃক জিম্মাত লোৱা হৈছে।
আৰক্ষীৰ মতে, ছোৱালীগৰাকী একেখন গাঁৱৰ এজন পুৰুষৰ সৈতে সম্পৰ্কত আছিল আৰু গৰ্ভৱতী হৈছিল। যেতিয়া তাইৰ পৰিয়ালৰ লোকে এই কথা জানিব পাৰিলে, তেতিয়া তেওঁলোক ক্ষুব্ধ হৈ পৰে।২৮ ছেপ্টেম্বৰ বৃহস্পতিবাৰে মহিলাগৰাকীৰ মাতৃ আৰু ভাতৃয়ে তেওঁক ওচৰৰ হাবিলৈ লৈ যায় আৰু তাতেই মহিলাগৰাকীৰ ওপৰত পেট্ৰল ছটিয়াই জুই লগাই দিয়ে।জ্যেষ্ঠ আৰক্ষী বিষয়া ৰাজকুমাৰ আগৰৱালাই কয় যে কিশোৰীগৰাকীৰ মাতৃ আৰু ভাতৃৰ বিৰুদ্ধে হত্যাৰ চেষ্টাৰ গোচৰ ৰুজু কৰা হৈছে আৰু ইতিমধ্যে তদন্ত আৰম্ভ হৈছে।
Continue Reading
