ডিজিটেল ডেস্ক: ক’ভিড কালত বিনামূলীয়া ৰেচন লাভ কৰিছিল ৮০ কোটি দৰিদ্ৰ জনতাই৷ স্বয়ং প্ৰধানমন্ত্ৰী মোদীয়ে সদৰি কৰা তথ্যত পোহৰলৈ আহিছিল ভাৰতৰ দৰিদ্ৰ নাগৰিকৰ পৰিসংখ্যা৷ আশী কোটি দৰিদ্ৰই বসবাস কৰা ভাৰতত এতিয়া তেওঁলোকৰ ভৰসা কেৰাচিন তেলৰ ঊৰ্ধ্বমুখী দাম হৈ পৰিছে বব নোৱৰা বোজা৷
এইবাৰ কেৰাচিনত হাত দিছে কেন্দ্ৰীয় চৰকাৰে৷ স্বৰাজোত্তৰ কালছোৱাত ৰাজহুৱা বিতৰণ ব্যৱস্থাৰ তালিকাভুক্ত অন্যতম প্ৰয়োজনীয় সামগ্ৰী আছিল কেৰাচিন৷ এতিয়া কেন্দ্ৰৰ বিজেপি চৰকাৰে পিডিএছৰ তালিকাৰ পৰা কেৰাচিন তেল কৰ্তনৰ বাবে ৰচিছে বিশেষ পৰিকল্পনা৷ এই পৰিকল্পনাৰ অংশ অনুসৰি হঠাৎ বৃদ্ধি পাইছে কেৰাচিনৰ দাম৷ চলিত বৰ্ষৰ মে’ পৰ্যন্ত দেশত ২৮ টকা দৰত সুলভ মূল্যৰ দোকানৰ জৰিয়তে উপলব্ধ হোৱা প্ৰতি লিটাৰ কেৰাচিনৰ দামে এতিয়া অতিক্ৰম কৰিছে শতকৰ ঘৰ৷ এতিয়া প্ৰতি লিটাৰ কেৰাচিনৰ দাম বৃদ্ধি পাইছে ১০২ টকালৈ৷
১০২ টকালৈ বৃদ্ধি পোৱাৰ বাবে সমগ্ৰ দেশতে একপ্ৰকাৰ বন্ধ হৈ পৰিছে পিডিএছৰ জৰিয়তে কেৰাচিনৰ ক্ৰয়-বিক্ৰয়৷ অস্বাভাৱিক হাৰত কেৰাচিনৰ দাম বৃদ্ধি পোৱা বাবে কেৰাচিন তেলৰ বিতৰণৰ দায়িত্ববাহী ডিপোসমূহে পিডিএছৰ অধীনত আবণ্টিত কেৰাচিন ক্ৰয় পৰ্ব৷ সৰ্বসাধাৰণৰ অত্যন্ত প্ৰয়োজনীয় হোৱা সত্ত্বেও বৰ্ধিত দামৰ বাবে ৰাইজে কেৰাচিন ক্ৰয় বন্ধ কৰিবলগীয়া হৈছে৷
আনহাতে, এক বিশেষ সূত্ৰৰ খবৰ অনুসৰি কেন্দ্ৰীয় চৰকাৰে চেনিৰ পাছত কেৰাচিন তেলো ৰাজহুৱা বিতৰণ ব্যৱস্থাৰ তালিকাৰ পৰা কৰ্তন কৰাৰ লক্ষ্য লৈছে৷ দেশৰ দৰিদ্ৰ জনতাক সকাহ দিবলৈ কেন্দ্ৰীয় চৰকাৰে কেৰাচিন তেলৰ আৰু এটকাও ৰাজসাহায্য ভৰিবলৈ আগ্ৰহী নহয়৷ কিন্তু, পোনপটীয়াকৈ পিডিএছৰ পৰা কেৰাচিন কৰ্তন কৰিলে কেৰাচিনৰ ডিপোসমূহৰ গৰাকীক ক্ষতিপূৰণ আদায় দিবলগীয়া হোৱাৰ আশংকাতে কেন্দ্ৰীয় চৰকাৰে কেৰাচিনৰ দাম-বৃদ্ধি কৰি প্ৰথমে ক্ৰয়-বিক্ৰয় বন্ধ কৰাৰ নীতি গ্ৰহণ কৰিছে৷
চৰকাৰৰ এনে জনবিৰোধী নীতিৰ বাবেই আচম্বিতে নিম্নগামী হৈছে কেৰাচিনৰ ক্ৰয়-বিক্ৰয়৷ এনে পৰিপ্ৰেক্ষিতত কেৰাচিনৰ বিক্ৰী সন্তোষজনক নহয় বুুলি যুক্তি দৰ্শাই কেন্দ্ৰীয় চৰকাৰে পিডিএছ ব্যৱস্থাৰ পৰা কেৰাচিন কৰ্তন কৰাৰ পথ প্ৰশস্ত কৰিছে৷ আৰু ইয়াৰ ফলত ক্ষতিগ্ৰস্ত হ’ব নিম্ন মধ্যবিত্ত আৰু দৰিদ্ৰ শ্ৰেণীৰ লোকসকল৷
ৰন্ধন গেছৰ অস্বাভাৱিক দামবৃদ্ধিৰ বাবে অধিকাংশ লোকেই কেৰাচিনৰ সহায়তে পাকঘৰৰ কাম-কাজ সমাপন কৰিবলৈ লৈছে৷ কিন্তু, চৰকাৰৰ এই সিদ্ধান্তই যে পুনৰ এবাৰ দুখীয়া ৰাইজৰ ওপৰত মাধমাৰ সোধাব, সেয়া নিশ্চিত৷
Continue Reading
