ডিজিটেল ডেস্ক: অগ্নিপথৰ প্ৰতিবাদে ক্ৰমশ: দেশত জটিল ৰূপ ধাৰণ কৰাত অধিক সতৰ্ক
হৈ পৰিছে ভাৰত চৰকাৰ৷ এইবাৰ কেন্দ্ৰীয় চৰকাৰৰ চকু ৱাটচএপ গ্ৰুপত৷ ভাৰত চৰকাৰৰ গৃহ
মন্ত্ৰণালয়ে আজি অগ্নিপথ আঁচনি আৰু অগ্নিবীৰ সম্পৰ্কে ভুৱা খবৰ প্ৰচাৰ কৰাৰ বাবে ৩৫টা
ৱাটছএপ গ্ৰুপ নিষিদ্ধ কৰিছে। উৰাবাতৰি প্ৰচাৰ আৰু প্ৰতিবাদ সংগঠিত কৰাৰ অভিযোগত কমেও
দহজন লোকক গ্ৰেপ্তাৰ কৰা হৈছে।
কেন্দ্ৰই ৱাটছএপৰ তথ্য পৰীক্ষাৰ বাবে জাৰি 8799711259 নম্বৰ৷ ছ’চিয়েল মিডিয়া
প্লেটফৰ্ম বিশেষকৈ বিহাৰৰ দৰে ৰাজ্যত প্ৰতিবাদ সংগঠিত কৰাৰ বাবে ৱাটছএপ ব্যৱহাৰ কৰাৰ
বাতৰিৰ মাজতে এই অভিযান চলাইছে কেন্দ্ৰই৷
১৭ জুনত বিহাৰ চৰকাৰে ১২খন জিলাত ইণ্টাৰনেট সেৱা স্থগিত ৰাখি কৈছিল যে জনসাধাৰণক
উচতনি দিয়া আৰু জীৱন আৰু সম্পত্তিৰ ক্ষতি কৰাৰ উদ্দেশ্যৰে উৰাবাতৰি বিয়পাবলৈ আপত্তিজনক
সমল প্ৰেৰণ কৰিবলৈ ইণ্টাৰনেট ব্যৱহাৰ কৰা হৈছে৷ পাটনাৰ জিলা প্ৰশাসনে এইটোও কৈছিল যে
গ্ৰেপ্তাৰ কৰা প্ৰতিবাদকাৰীসকলৰ মোবাইল ফোনৰ পৰা সংগ্ৰহ কৰা তথ্যই প্ৰশিক্ষণ কেন্দ্ৰৰ
ভূমিকাৰ ফালে আঙুলিয়াই দিছিল।
তেলেংগানা আৰক্ষীয়ে অন্ধ্ৰপ্ৰদেশৰ পালনাডু জিলাৰ নাৰাচাৰাওপেট চহৰৰ এটা প্ৰশিক্ষণ
প্ৰতিষ্ঠানৰ স্বত্বাধিকাৰীক অগ্নিপথ আঁচনিৰ বিৰুদ্ধে প্ৰতিবাদত অংশগ্ৰহণ কৰিবলৈ যুৱকসকলক
উচতনি দিয়াৰ অভিযোগত গ্ৰেপ্তাৰ কৰে। আটকাধীন প্ৰশিক্ষণ প্ৰতিষ্ঠানটোৰ গৰাকী আভুলা
চুব্বা ৰাওৰ বিৰুদ্ধে ‘হাকিমপেট আৰ্মি
ছ’লজাৰ’ নামৰ এটা ৱাটছএপ
গ্ৰুপ সৃষ্টি কৰাৰ অভিযোগ আছে, য’ত শ শ সেনাপ্ৰত্যাশী অন্তৰ্ভুক্ত আছিল। এই গ্ৰুপটোত
তেওঁ সকলো সদস্যলৈ বাৰ্তা প্ৰেৰণ কৰিছিল আৰু তেওঁলোকক প্ৰতিবাদত অংশগ্ৰহণ কৰিবলৈ কৈছিল।
প্ৰতিবাদৰ মাজতে কেন্দ্ৰই স্পষ্ট কৰি দিছে যে চাৰি বছৰৰ কাৰ্যকালৰ বাবে সশস্ত্ৰ
বাহিনীত নিযুক্তিৰ বাবে অগ্নিপথ আঁচনি ৰ’লবেক কৰা নহ’ব। প্ৰতিবাদী হিংসা আৰু অগ্নিসংযোগৰ বিষয়ত প্ৰতিৰক্ষা
মন্ত্ৰালয়ে কৈছিল যে হিংসাত্মক প্ৰতিবাদত অভিযুক্তসকলক নিয়োগ কৰা নহ’ব৷ প্ৰাৰ্থীসকলে প্ৰতিবাদত অংশগ্ৰহণ নকৰা বুলি
উল্লেখ কৰি এখন লিখিত ঘোষণাপত্ৰ দাখিল কৰিব লাগিব আৰু সেই স্বপ্ৰত্যায়িত ঘোষণাপত্ৰ
আৰক্ষীৰ দ্বাৰা প্ৰমাণিত হ’ব।
Continue Reading
