ডিজিটেল ডেস্কঃ অংগদানেৰে নজিৰ সৃষ্টি দিল্লী এইমছৰ। ব্ৰেইন ডেথত মৃত্যু হোৱা ৬ বছৰীয়া শিশু কন্যাৰ অংগদানৰ বাবে ৫জন ৰোগীয়ে পালে জীৱনদান। এক ভয়ংকৰ ঘটনাত জীয়ৰীক হেৰুৱাৰ পিছতো শিশুকন্যাটিৰ অংগদান কৰিবলৈ সন্মত হৈছিল পিতৃ-মাতৃ। ৰাজধানীৰ বিখ্যাত চিকিৎসালয়খনৰ ইতিহাসত এইগৰাকী শিশুকন্যা আটাইতকৈ কম বয়সীয়া অংগদাতা হিচাপে বিবেচিত হৈছে। শিশুটিৰ পিতৃ-মাতৃৰ ওচৰত কৃতজ্ঞ বুলি মন্তব্য চিকিৎসকৰ।
কাৰাগাৰৰ পৰা পলায়ন কৰা এজন দুষ্কৃতিকাৰীয়ে ৬ বছৰীয়া ৰ’লী প্ৰজাপতিৰ মূৰত গুলীয়ায়। ততাতৈয়াকৈ তেওঁক স্থানীয় চিকিৎসালয়লৈ প্ৰেৰণ কৰা হয়। সংকটজনক অৱস্থাৰ বাবে ২৬ এপ্ৰিলত দিল্লী এইমছলৈ প্ৰেৰণ কৰা হৈছিল শিশুটিক। কিন্তু এইমছৰ চিকিৎসকে কয় যে, ‘যেতিয়া ৰ’লীক চিকিৎসালয়লৈ অনা হৈছিল তেতিয়া তেওঁৰ অৱস্থা ব্ৰেইন ডেথৰ দৰেই আছিল। গুলীটো মূৰত লাগি আছিল। শিশুটিক বচাব পৰা নগ’ল।’ ইয়াৰ পিছতে এইমছৰ চিকিৎসকে ৰ’লীৰ অভিভাৱকক অংগদানৰ বিষয়ে অৱগত কৰে।
এইমছৰ স্নায়ুচাৰ্জন ডাঃ দীপক গুপ্তাই কয়, ‘ ৰ’লীৰ পিতৃ-মাতৃৰ ওচৰত আমি কৃতজ্ঞ। যদিও তেওঁলোকে এই বিষয়ে বিশেষ নাজানিছিল, তথাপি তেওঁলোকে সন্মতি প্ৰদান কৰিছে।’
মন কৰিবলগীয়া যে, শিশুটিৰ হৃদযন্ত্ৰ, বৃক্ক, ছাল, যকৃত আদি আঁতৰাই পাঁচজন ৰোগীৰ শৰীৰত প্ৰতিস্থাপন কৰা হয়। ৰোগীকেইজনৰ স্বাস্থ্য বৰ্তমান সুস্থিৰ বুলি জানিব পৰা গৈছে।
ৰ’লীৰ পিতৃ হলী নাৰায়ণ প্ৰজাপতিয়ে কয় যে, ‘চিকিৎসকে আমাক বুজাইছে যে তেওঁৰ অংগ-প্ৰত্যংগই আন ৰোগীৰ জীৱন ৰক্ষা কৰিব পাৰে। ৰ’লীৰ মাতৃ আৰু মই একমত। আমাৰ ছোৱালীজনী অন্ততঃ আনৰ শৰীৰত জীয়াই থাকিব, মুখত হাঁহি আনি দিব।’ শিশুটিৰ মাতৃ পুনম দেৱীয়ে কয়, ‘আমাৰ জীয়ৰীয়ে আমাক এৰি থৈ গ'লেও কিন্তু আনৰ জীৱন ৰক্ষা কৰিলে।’
Continue Reading
