অৰ্হতা অনুসৰি সংস্থাপন পাইছেনে ভাৰতত ?

ডিজিটেল ডেস্ক: সম্প্ৰতি ভাৰতত ৩.০৩ কোটি যুৱক-যুৱতী কৰ্মসংস্থাপনহীন হৈ আছে৷ ২০২০ বৰ্ষত ক’ভিড লকডাউনৰ সময়তকৈও নিবনুৱাৰ হাৰ বৃদ্ধি হৈছে৷ ৰে’লৱে পৰীক্ষাত হোৱা খেলিমেলিৰ পিছত প্ৰাৰ্থীসকলে উত্তৰ প্ৰদেশ আৰু বিহাৰত প্ৰতিবাদ কৰিছিল। তেওঁলোকৰ প্ৰতিবাদৰ পদ্ধতি ৰে’ল জ্বলোৱা পৰ্যায়ত উপণীত হৈছিল। এতিয়া প্ৰশ্ন হৈছে, মাত্ৰ এটা পৰীক্ষাত হোৱা খেলিমেলিৰ বাবেই এই লোকসকলৰ ইমান ক্ষোভ নেকি? বিশেষজ্ঞসকলে সেইটো বিশ্বাস নকৰে। নিবনুৱাৰ তথ্য প্ৰকাশ কৰা সংস্থা ‘চেণ্টাৰ ফৰ মনিটৰিং ইণ্ডিয়ান ইকনমী’ৰ শেহতীয়া তথ্য অনুসৰি, যোৱা বছৰৰ ছেপ্টেম্বৰৰ পৰা ডিচেম্বৰলৈ দেশত মুঠ নিবনুৱাৰ সংখ্যা আছিল ৩.১৮ কোটি। ইয়াৰ ভিতৰত, ৩.০৩ কোটিৰ বয়স ২৯ বছৰৰ তলৰ। এই সংখ্যাটো ২০২০ চনত সমগ্ৰ দেশত হোৱা লকডাউনৰ সময়ৰ নিবনুৱাতকৈও বেছি। সেই সময়ত, দেশত ২.৯৩ কোটি নিবনুৱা আছিল। সংস্থাটোৱে প্ৰকাশ কৰা তথ্য অনুসৰি, ১.১৮ কোটিতকৈও অধিক স্নাতক বৰ্তমান নিবনুৱা৷ চিএমআইইৰ মুখ্য কাৰ্যবাহী বিষয়া মহেশ ব্যাস আৰু ডি কে যোশীয়ে নিবনুৱা সম্পৰ্কীয় কেতবোৰ প্ৰশ্নৰ উত্তৰ দিছে৷ স্নাতকসকল কিয় অধিক নিবনুৱা বুলি সোধা এক প্ৰশ্নৰ উত্তৰত এজন কম শিক্ষিত ব্যক্তিয়ে সৰু কাম কৰিবলৈ আৰম্ভ কৰে। শিক্ষিত যুৱক-যুৱতীসকলে তেওঁলোকৰ অৰ্হতা অনুসৰি চাকৰি বিচাৰে। নিবনুৱা বৃদ্ধিৰ কাৰণ হিচাপে কেইবছৰমানৰ পৰা অৰ্থনীতি সন্তুলিতভাৱে বৃদ্ধি নোহোৱা বিষয়টোক মুখ্য কাৰণ হিচাপে অভিহিত কৰা হৈছে৷ মহামাৰীৰ পৰা এতিয়ালৈকে পুনৰুদ্ধাৰ নোহোৱা অঞ্চলবোৰৰ অৱস্থা উন্নত হোৱাৰ সম্ভাৱনা আছে।