ডিজিটেল ডেস্কঃ বিশ্বকাপৰ পৰা বাহিৰ হৈ নিজ দেশলৈ উভতি আহিছে পাকিস্তানী ক্ৰিকেট দল। এনে পৰিস্থিতিত প্ৰাক্তন পাকিস্তানী খেলুৱৈয়ে নিজৰ দলটোক লক্ষ্য কৰি বাবৰ আজমক অধিনায়ক পদৰ পৰা অপসাৰণৰ দাবী জনাইছে। শেহতীয়াকৈ এক মন্তব্য কৰি সমালোচনাৰ সন্মুখীন হৈছে পাকিস্তানৰ প্ৰাক্তন অল ৰাউণ্ডাৰ আব্দুল ৰাজ্জাক।
পাকিস্তানী দলৰ দুৰ্বল প্ৰদৰ্শনৰ বিষয়ে আলোচনা কৰি আব্দুল ৰাজ্জাক কয় যে, "ভাল প্ৰদৰ্শন কৰিবলৈ দলটোৰ উদ্দেশ্য সঠিক হ'ব লাগে। যদি আপুনি ভাবে যে মই ঐশ্বৰ্যক বিয়া কৰাম আৰু আদৰ্শ সন্তান জন্ম দিম, তেন্তে সেয়া নহ'ব। আপোনাৰ উদ্দেশ্য সঠিক হ'ব লাগে।"
পাকিস্তান ক্ৰিকেট ব’ৰ্ডৰ (পিচিবি) উদ্দেশ্যক লৈ প্ৰশ্ন উত্থাপন কৰি ৰাজ্জাকে এই বক্তব্য দিছিল, যিটো এতিয়া এই হুলস্থুলৰ কাৰণ হৈ পৰিছে আৰু তেওঁক তীব্ৰ সমালোচনা কৰা হৈছে।
ৰাজ্জাকে যেতিয়া ঐশ্বৰ্যক লৈ এই বক্তব্য দি আছিল, তেতিয়া শ্বাহিদ আফ্ৰিদী, উমৰ গুলৰ বাহিৰেও বহু প্ৰাক্তন পাকিস্তানী খেলুৱৈ মঞ্চত উপস্থিত আছিল। কিন্তু ৰাজ্জাকে এই কথা কওঁতে তেওঁক কোনেও বাধা নিদিলে বা তেওঁৰ বক্তব্যত আপত্তি নকৰিলে, বৰঞ্চ প্ৰাক্তন ক্ৰিকেটাৰ কেইগৰাকীয়ে হাঁহি আৰু হাত চাপৰি বজাই থকা দেখা গ’ল।
এনে পৰিস্থিতিত এতিয়া ছ’চিয়েল মিডিয়াত তেওঁলোকক সমালোচনা কৰা হৈছে।
ৰাজ্জাকৰ এই বক্তব্যক আপত্তি কৰি এজন ব্যৱহাৰকাৰীয়ে লিখিছে, ‘এয়া পাকিস্তানী ক্ৰিকেটাৰসকলৰ মানসিকতা। ঐশ্বৰ্য ৰায় বচ্চনৰ ওপৰত মন্তব্য কৰাৰ বাবে আব্দুল ৰাজ্জাকে লাজ পাব লাগে।
আন এজনে লিখিছে- ‘ঐশ্বৰ্যৰ সন্দৰ্ভত ৰাজ্জাকে যি উদাহৰণ দিছে সেয়া লজ্জাজনক। চাওকচোন একেলগে বহি থকা আন নিৰ্লজ্জ ক্ৰিকেটাৰসকলে কেনেকৈ হাত চাপৰি বজাই হাঁহিছে?
একেদৰে আন ব্যৱহাৰকাৰীসকলেও এই বিষয়ত নিজৰ মতামত দি অসন্তুষ্টি প্ৰকাশ কৰিছে।
Continue Reading
