ডিজিটেল ডেস্কঃ কিছুমানে শুই উঠি চাহৰ সলনি কফিৰ চুমুক দি ভাল পায়। কফি শ্বপত ঘণ্টাৰ পিছত ঘণ্টা আড্ডা দিবলৈ অধিক উৎসাহী হৈ পৰে নৱপ্ৰজন্ম। তালৈ লক্ষ্য ৰাখিয়ে 'ষ্টাৰবাকছ’-এ বজাৰলৈ আনিছে বিভিন্নধৰণৰ কফি।
কোনোৱে বিশুদ্ধ ক’লা কফি ভাল পায়, কোনোৱে ঠাণ্ডা কফি ভাল পায়। কিন্তু আপুনি কেতিয়াবা ভাবিছেনে কফিত অলিভ অইলৰ সোৱাদ কেনেকুৱা হ’ব? এইবাৰ ‘ষ্টাৰবাকছ’-এ গ্ৰাহকৰ বাবে আনিছে অলিভ অইল কফি। এই নতুন সোৱাদযুক্ত কফি কেৱল ইটালীত উপলব্ধ হৈছে। কেইদিনমানৰ পিছত আমেৰিকাতো উপলব্ধ হ’ব। অৱশ্যে ভাৰতীয় বজাৰলৈ কেতিয়া আহিব সেই সন্দৰ্ভত স্পষ্টকৈ একো কোৱা নাই কোম্পানীটোৱে।
অহা এপ্ৰিল মাহত ষ্টাৰবাকছৰ চিইঅ’ পদৰ পৰা পদত্যাগ কৰিব হাৱাৰ্ড শ্বাল্টজে। অৱসৰৰ আগতে হাৱাৰ্ডে নতুন কফিৰ প্ৰচলন কৰিছে। অলিভ অইলৰ সৈতে মিহলি কৰা এই কফিবিধ ইটালীৰ ২০টা ষ্ট’ৰত উপলব্ধ। Oliato নামৰ এই কফিবিঘধ ঠাণ্ডা আৰু গৰম দুয়োটা ৰূপতে উপলব্ধ।
এই কফিৰ সোৱাদ কেনেকুৱা হ’ব? হাৱাৰ্ড শ্বাল্টজে কয়, “যেতিয়া মই প্ৰথমবাৰৰ বাবে এই কফিৰ সোৱাদ লৈছিলো, তেতিয়া মই যথেষ্ট আচৰিত হৈছিলো। অতি সোৱাদযুক্ত পানীয়! এবাৰ এই কফি খালে মুখত সোৱাদটো বহুদিন থাকিব।’’
Continue Reading
