অমিতাভ বচ্চন আমাৰ বাবে ভগৱান! আমেৰিকা নিৱাসী শেঠ পৰিয়ালৰ ঘৰত স্থাপন অমিতাভৰ প্ৰতিমূৰ্তি

অমিতাভ বচ্চনক বলীউডৰ শ্বাহেনশ্বাহ বুলি কোৱা হয়। তেওঁৰ স্বাস্থ্যৰ সামান্যতম অৱনতি ঘটিলেই হাজাৰ হাজাৰ হাত প্ৰাৰ্থনা-দোৱাৰ দিশে আগবাঢ়ে।  তেওঁৰ আৰোগ্য কামনাৰে মন্দিৰে মন্দিৰে জ্বলে চাকি। দেওবাৰে তেওঁৰ ঘৰৰ বাহিৰত প্ৰায়ে বিশাল জনসমাগম গোট খায়। এতিয়া আমেৰিকাৰ এটা ভাৰতীয় পৰিয়ালক লৈ আলোচনা চলি আছে। এই পৰিয়ালটোৱে অমিতাভ বচ্চনক ভগৱানৰ মৰ্যাদা দিছে। শনিবাৰে তেওঁলোকৰ নতুন ঘৰৰ বাহিৰত অমিতাভ বচ্চনৰ প্ৰতিমূৰ্তি স্থাপন কৰে। গোপী শেঠ ঘৰৰ বাহিৰত অমিতাভ বচ্চনৰ প্ৰতিমূৰ্তি স্থাপন কৰা হয় আৰু প্ৰতিমূৰ্তিটোৰ উদ্বোধনী অনুষ্ঠানত বহু লোকে অংশগ্ৰহণ কৰে। কাঁচৰ বাকচত ৰখা প্ৰিয় তাৰকাগৰাকীৰ মূৰ্তিটো এবাৰ চাবলৈ সকলোৱে উৎসুক হৈ পৰিছিল। আমেৰিকা যুক্তৰাষ্ট্ৰৰ এজন মন্ত্ৰী এলবাৰ্ট জাছানীয়ে আনুষ্ঠানিকভাৱে প্ৰতিমূৰ্তিটো উদ্বোধন কৰে। আতচবাজীৰ শব্দ, অমিতাভৰ চলচ্চিত্ৰ গীতৰ তালে তালে সমবেত সকলোৱে নৃত্য কৰিছিল।

ৰিংকু আৰু গোপী শেঠৰ ঘৰত অমিতাভ বচ্চনৰ প্ৰতিমূৰ্তি মুকলি অনুষ্ঠানত ৬০০ৰো অধিক লোক সমবেত হয়। গোপী শেঠে প্ৰকাশ কৰে যে ''তেওঁ আৰু তেওঁৰ পত্নীৰ বাবে অমিতাভ বচ্চন ভগৱানতকৈ কম নহয়। তেওঁ কয়, অমিতাভজীয়ে আমাক কেৱল ৰিল লাইফতে নহয় বাস্তৱ জীৱনতো অনুপ্ৰাণিত কৰে। তেওঁ অতি 'ডাউন টু আৰ্থ' ব্যক্তি। তেওঁ নিজৰ অনুৰাগীসকলক বহুত গুৰুত্ব দিয়ে। তেওঁ আন বহুতো তাৰকাৰ দৰে নহয়।''

উল্লেখ্য যে অমিতাভ বচ্চনৰ প্ৰতিমূৰ্তিটো তৈয়াৰ কৰোতে তেওঁলোকে খৰচ কৰিছে প্ৰায় ৬০ লাখ টকা।