পাকিস্তানত বান, মোডীৰ সমবেদনা...

ডিজিটেল ডেস্ক: চুবুৰীয়া দেশ পাকিস্তানত এতিয়া বানে তাণ্ডৱৰ সৃষ্টি কৰিছে। দেশখনত বৰ্তমানলৈকে ১১৩৬জন বানাক্ৰান্তৰ মৃত্যু হৈছে। বহুলোক এতিয়াও আছে আশ্ৰয় শিবিৰত। আৰ্থিক সংকটে দেখা দিয়া দেশখনৰ প্ৰধানমন্ত্ৰীয়ে বিচাৰিছে সকলোৰে পৰা সহায়ৰ হাত। তেনে সময়ছোৱাত চৰ্চা লাভ কৰিছে ভাৰতৰ প্ৰধানমন্ত্ৰী নৰেন্দ্ৰ মোডীৰ এক বিশেষ টুইটে।

চুবুৰীয়া ৰাষ্ট্ৰখনৰ শেহতীয়া পৰিস্থিতিক লৈ মোডীয়ে টুইটটোত লিখে,  “পাকিস্তানত শেহতীয়াভাৱে বানে যি তাণ্ডৱৰ সৃষ্টি কৰিছে তাক লৈ মই যথেষ্ট দুখ পাইছো। মই বানাক্ৰান্ত, আঘাটপ্ৰাপ্ত আৰু প্ৰাকৃতিক দুৰ্যোগৰ দ্বাৰা প্ৰভাৱিত লোকসকলৰ প্ৰতি মোৰ সমবেদনা জ্ঞাপন কৰিছো আৰু শীঘ্ৰে স্বাভাৱিক অৱস্থা ঘূৰি অহাৰ কামনা কৰিছো।”

একে সময়তে অৰ্থনৈতিক সংকটৰ সন্মুখীন হোৱা পাকিস্তানৰ প্ৰধানমন্ত্ৰী শ্বাহবাজ শ্বৰীফ চৰকাৰৰ আবেদনৰ পিছত আন্তঃৰাষ্ট্ৰীয় সাহায্য লাভ কৰিবলৈ আৰম্ভ কৰিছে। সম্প্ৰতি পাকিস্তানৰ বান পৰিস্থিতি অধিক বেয়াৰ দিশে গতি কৰিছে। ৩.৩ কোটি জনসংখ্যা থকা দেশখনৰ মুঠ জনসংখ্যাৰ প্ৰায় এক সপ্তমাংশই নিজৰ ঘৰ এৰি যাব লগা হৈছে। বানে পাকিস্তানত কিমান ভয়াৱহ পৰিস্থিতিৰ সৃষ্টি কৰিছে সেইয়া এই পৰিসংখ্যাই স্পষ্ট কৰিছে।

ইফালে দেশখনৰ প্ৰাকৃতিক দুৰ্যোগৰ সৈতে মোকাবিলা কৰা মূল ৰাষ্ট্ৰীয় সংস্থা ৰাষ্ট্ৰীয় দুৰ্যোগ ব্যৱস্থাপনা প্ৰাধিকৰণে সোমবাৰে প্ৰকাশ কৰা শেহতীয়া তথ্য অনুসৰি বানপানীৰ ফলত বৰ্তমানলৈকে আহত হৈছে ১৬৩৪ জন লোক। আনহাতে প্ৰায় ৯,৯২,৮৭১ টা ঘৰ সম্পূৰ্ণ বা আংশিকভাৱে ক্ষতিগ্ৰস্ত হোৱাৰ ফলত লাখ লাখ লোক খাদ্য আৰু বিশুদ্ধ খোৱাপানী আদিৰ পৰা বঞ্চিত হৈছে। ইয়াৰ লগতে প্ৰায় ৭ লাখ ৩৫ হাজাৰ ৩৭৫ লাখ জীৱ-জন্তুও নিৰুদ্দেশ হৈ আছে আৰু অবিৰত বৰষুণৰ ফলত লাখ লাখ একৰ উৰ্বৰ ভূমি পানীত ডুব গৈছে।