ডিজিটেল ডেস্কঃ ভাৰতৰ অঞ্জু প্ৰসাদ নামৰ মহিলাগৰাকীয়ে পাকিস্তানৰ নছৰুল্লাহ নামৰ যুৱকজনৰ সৈতে গঢ়ি তোলা প্ৰেমে দুয়োখন দেশতে চৰ্চা লাভ কৰিছে। ফেচবুকৰ জৰিয়তে দুয়োৰে চিনাকি হৈছিল। ২০১৯ চনত দুয়োৰে বন্ধুত্ব গঢ় লৈ উঠিছিল ফেচবুকত। ৩৪ বছৰীয়া অঞ্জু প্ৰেমত পৰে ২৯ বছৰীয়া নছৰুল্লাহৰ। আনহাতে অঞ্জু এগৰাকী বিবাহিতা মহিলা আৰু তেওঁৰ দুটি সন্তান আছে।
স্বামী অৰবিন্দৰ সংগ এৰি পাকিস্তানত থকা প্ৰেমিকক লগ পাবলৈ ভাৰতীয় মহিলা অঞ্জু যাদৱে পাকিস্তানলৈ যোৱাৰ সিদ্ধান্ত লৈছিল। সেইমৰ্মে তেওঁ পাকিস্তান ভ্ৰমণৰ অনুমতি বিচাৰি আবেদনো কৰিছিল। তেওঁ অনুমতি লাভো কৰিছিল। অঞ্জু-নাছৰুল্লাহৰ প্ৰেম কাহিনীয়ে এতিয়া সীমান্ত পাৰ হৈ বহুতৰে মাজত চৰ্চাৰ বিষয় হৈ পৰিছে।
তেওঁৰ আবেদনখন ২১ জুনত দাখিল কৰা হৈছিল। ইয়াৰ কিছুদিন পিছতে ২১ জুলাইত ভাৰতীয় মহিলাগৰাকীয়ে পাকিস্তানত প্ৰৱেশ কৰে।
মঙলবাৰে দুটা সন্তানৰ মাতৃ অঞ্জুৱে তেওঁৰ ফেচবুক বন্ধু নছৰুল্লাহক বিয়া কৰায় আৰু ইছলাম ধৰ্ম গ্ৰহণ কৰে। ইছলাম ধৰ্ম গ্ৰহণ কৰি অঞ্জুৱে ফাতিমা নাম গ্ৰহণ কৰিছে।
এই কাৰ্যত ক্ষুণ্ণ হৈ পৰিছে অঞ্জুৰ পিতৃ। তেওঁ কয় যে ''অঞ্জু আমাৰ বাবে মৰি গৈছে। আমি তাইক কেতিয়াও গ্ৰহণ নকৰো আৰু তাইক কেতিয়াও ভাৰতত সোমাবলৈ দিব নালাগে।''
ইয়াৰ লগতে অঞ্জুৰ কন্যাই এই সন্দৰ্ভত কয় ''অঞ্জু এতিয়া আৰু আমাৰ মা নহয়। আমাৰ সকলো ধ্বংস হৈ গ'ল। মা পাকিস্তানলৈ গৈ দ্বিতীয়বাৰৰ বাবে বিয়া পাতি বৰ লজ্জাজনক কাণ্ড কৰিলে। আমি এতিয়া কেনেকৈ এই সমাজত জীয়াই থাকিব পাৰিম আমি নাজানো।''
Continue Reading
