ডিজিটেল ডেস্কঃ উচ্চতম ন্যায়ালয়ৰ পাঁচজনীয়া ন্যায়াধীশেৰে গঠিত সংবিধান বিচাৰপীঠে সোমবাৰে কাশ্মীৰৰ পৰা অনুচ্ছেদ ৩৭০ বাতিল কৰাৰ বিৰুদ্ধে কৰা আবেদনৰ বিষয়ত গুৰুত্বপূৰ্ণ ৰায় প্ৰদান কৰে।উচ্চতম ন্যায়ালয়ৰ মুখ্য ন্যায়াধীশ চন্দ্ৰচূড়ে কয় যে জম্মু আৰু কাশ্মীৰ ভাৰতৰ এক অবিচ্ছেদ্য অংগ।
উচ্চতম ন্যায়ালয়ে ৫ আগষ্ট ২০১৯ ত কেন্দ্ৰীয় চৰকাৰে গ্ৰহণ কৰা সিদ্ধান্তকে বাহাল ৰাখে।ন্যায়ালয়ৰ ৰায়ৰ পিছতে জম্মু-কাশ্মীৰৰ প্ৰাক্তন মহাৰজা হৰি সিঙৰ পুত্ৰ কৰণ সিঙে প্ৰতিক্ৰিয়া ব্যক্ত কৰিছে।বৰ্তমানৰ জ্যেষ্ঠ কংগ্ৰেছ নেতা তথা মহাৰজা হৰি সিঙৰ পুত্ৰ কৰণ সিঙে আদালতৰ সিদ্ধান্তক আদৰণি জনাইছে।
কৰণ সিঙে কয় , "মই আদালতৰ ৰায়ক স্বাগতম জনাইছো। এয়া এতিয়া স্পষ্ট হৈ পৰিছে যে যি ঘটিছিল সেয়া সাংবিধানিকভাৱে বৈধ আছিল... মই প্ৰধানমন্ত্ৰী নৰেন্দ্ৰ মোদীক শীঘ্ৰে কাশ্মীৰৰ ৰাজ্যৰ মৰ্যাদা পুনৰ বাহাল কৰিবলৈ অনুৰোধ জনাইছো..."। উল্লেখ্য এসময়ত কাশ্মীৰৰ ৰজা হৰি সিঙে পাকিস্তানৰ একাংশ লোকৰ অত্যাচাৰ সহ্য কৰিব নোৱাৰি চুক্তি স্বাক্ষৰ কৰি ভাৰতৰ সৈতে চামিল হৈছে। ৰজা হৰি সিঙৰ পুত্ৰ কৰণ সিং এতিয়াও জীয়াই আছে আৰু তেওঁ বৰ্তমান কংগ্ৰেছৰ এগৰাকী জ্যেষ্ঠ নেতা।
সোমবাৰে আদালতে এইবুলিও কয় যে জম্মু আৰু কাশ্মীৰত ২০২৪ চনৰ ৩০ ছেপ্টেম্বৰৰ ভিতৰত নিৰ্বাচন অনুষ্ঠিত হ'ব লাগে। ইয়াৰ বাবে প্ৰস্তুতি চলোৱা উচিত। কাশ্মীৰলৈ ৰাজ্যৰ মৰ্যাদা অতি সোনকালে বাহাল কৰিব লাগে বুলিও বিভিন্ন মহলে দাবী জনাই আহিছে।
Continue Reading
