অপহৰণ, দলবদ্ধ বলাৎকাৰ, তাৰ পাছত চুলি কাটি, ডিঙিত জোতাৰ মালা পিন্ধাই পথত ঘূৰালে মহিলাক!

ডিজিটেল ডেস্ক : সমগ্ৰ দেশ ৭৩সংখ্যক গণৰাজ্য দিৱসৰ আনন্দ উদযাপনত ব্যস্ত হৈ থকাৰ সময়তে দেশৰ ৰাজধানী দিল্লীত এগৰাকী মহিলাৰ জীৱনলৈ নামি আহিছিল অমানিশা। গণৰাজ্য দিৱসৰ দিনাই এগৰাকী যুৱতীক অপৰহণ কৰি নি দলবদ্ধ বলাৎকাৰ কৰিছিল কেইজনমান লোকে। দিল্লী আৰক্ষীয়ে আজি এই ঘটনাত জড়িত চাৰিজন লোকক গ্ৰেপ্তাৰ কৰিছে। দিল্লীৰ বিবেক বিহাৰ এলেকাত এই ঘটনা সংঘটিত হোৱাৰ কথা পোহৰলৈ আহিছে। এই ঘটনাই এতিয়া দেশজুৰি চাঞ্চল্যৰ সৃষ্টি কৰিছে। দেশৰ ৰাজধানী দিল্লীত এনে দলবদ্ধ বলাৎকাৰৰ ঘটনা নতুন কথা নহয়। নিৰ্ভয়া কাণ্ডৰ দৰে কলংকই দিল্লীৰ ইতিহাসক নতজানু কৰি ৰাখিছে। শেহতীয়াকৈ এনে ধৰণৰ ঘটনা কিছু হ্ৰাস হোৱা বুলি ধাৰণা কৰিলেও গণৰাজ্য দিৱসৰ দিনাই দিল্লীত সংঘটিত এটা ঘটনাই পুনৰ দেশৰ ৰাজধানীখনক কলংকিত কৰি তুলিলে। আৰক্ষীয়ে প্ৰকাশ কৰা মতে, অভিযুক্তৰ সৈতে মহিলাগৰাকীৰ ব্যক্তিগত শত্ৰুতাৰ পৰিণতিতে এই ঘটনা সংঘটিত হয়। অভিযুক্তকেইজনে যুৱতীগৰাকীৰ চুলি খলপা-খলপকৈ কাটি পেলোৱাৰ লগতে তেওঁক জোতাৰ মালা পিন্ধাই ৰাস্তাত খোজ কাঢ়িবলৈও বাধ্য কৰোঁৱা বুলি অভিযোগ উঠিছে। মহিলাগৰাকী বিবাহিতা আৰু তেওঁৰ এটি সন্তানো আছে বুলি আৰক্ষীয়ে প্ৰকাশ কৰিছে। ঘটনাৰ সূত্ৰপাত ঘটে এজন যুৱকৰ আত্মহত্যাক কেন্দ্ৰ কৰি। মহিলাগৰাকীক তেওঁৰ চুবুৰীয়া এজন যুৱকে অনুসৰণ কৰিছিল আৰু যোৱা নৱেম্বৰ মাহত যুৱকজনে আত্মহত্যা কৰে। যুৱকজনৰ পৰিয়ালে তেওঁৰ আত্মহত্যাৰ বাবে মহিলাগৰাকীক অভিযুক্ত কৰি তেওঁ ধৰি বান্ধি নিয়ে আৰু তাৰ পাছতে তেওঁৰ ওপৰত এই নাৰকীয় নিৰ্যাতন চলোৱা হয়। এই ঘটনাক লৈ তীব্ৰ চঞ্চল্যৰ সৃষ্টি হৈছে আৰু আৰক্ষীয়ে এই ঘটনাক অতি গভীৰভাৱে লৈ তদন্ত প্ৰক্ৰিয়া তীব্ৰতৰ কৰি তুলিছে। ইফালে দিল্লীৰ মহিলা আয়োগেও ঘটনাটো সম্পৰ্কত দিল্লী আৰক্ষীলৈ জাননী জাৰি কৰিছে।