অপ্ৰতীৰোধ্য সূৰ্যকুমাৰ! এবছৰৰ ভিতৰতে টি২০ ক্ৰিকেটত ১০০০ ৰাণ সংগ্ৰহ কৰা দ্বিতীয়জন বেটাৰ হিচাপে পৰিগণিত সূৰ্যকুমাৰ

ডিজিটেল ডেস্কঃ যেন একোৱেই ৰোধ কৰিব নোৱাৰে সূৰ্যকুমাৰ যাদৱক! টি২০ বিশ্বকাপত দূৰ্দান্ত ফৰ্মত আছে টীম ইণ্ডিয়াৰ নতুন তাৰকাগৰাকী। আজি জিম্বাবুৱেৰ বিৰুদ্ধেও উজ্বলি উঠে সূৰ্যকুমাৰ। মাত্ৰ ২৫টা বলত ৬১ ৰাণৰ এটা মাৰমুখী ইনিংছ উপহাৰ দিয়ে বেটাৰগৰাকীয়ে।

মাৰমুখী ইনিংছটোৰে সূৰ্যকুমাৰে কেইবাটাও অভিলেখৰ গৰাকী হৈছে। ইনিংছটো খেলি থাকোতেই তেওঁ এটা বৰ্ষৰ ছিজনত আন্তৰ্জাতিক টি২০ ক্ৰিকেটত ১০০০ ৰাণ কৰিবলৈ সক্ষম হোৱা দ্বিতীয়জন বেটাৰ হিচাপে পৰিগণতি হয়। মুঠ ২৮ খন মেচ খেলি তেওঁ এই অভিলেখৰ গৰাকী হৈছে।

এইক্ষেত্ৰত সূৰ্যকুমাৰ পাকিস্তানৰ মহম্মদ ৰিঝৱানতকৈ আগত আছে। চলিত বৰ্ষত ৰিঝৱানে ২৩খন টি২০ মেচ খেলি ৯২৪ ৰাণ কৰিবলৈ সক্ষম হৈছে। তদুপৰি ২৩ বলত ৬১ কৰি দ্ৰুততম টি২০ অৰ্ধশতক কৰা চতুৰ্থজন ভাৰতীয় হিচাপে বিবেচিত হয় সূৰ্যকুমাৰ।

আনহাতে এটা বৰ্ষত ১০০০ ৰাণ সংগ্ৰহ কৰিবলৈ সক্ষম হোৱা প্ৰথমগৰাকী বেটাৰ আছিল পাকিস্তানৰ মহ্ম্মদ ৰিঝৱান। টি২০ বিশ্বকাপত ব্যৰ্থ হ’লেও ইয়াৰ আগলৈকে দূৰ্দান্ত ফৰ্মত আছিল উইকেটকীপাৰ বেটাৰগৰাকী।

উল্লেখ্য যে চলিত বিশ্বকাপত সূৰ্যকুমাৰে বৰ্তমানলৈকে ৫খন মেচ খেলি ২২৫ ৰাণ সংগ্ৰহ কৰিবলৈ সক্ষম হৈছে। ইয়াৰ ভিতৰত আছে ৩টাকৈ অৰ্ধশতক।