ডিজিজেট ডেস্কঃ কিছুদিনৰ পাছত ডেভিদ ৱাৰ্নাৰে জীৱনৰ শেষৰখন টেষ্ট মেচ খেলিবলৈ ওলাইছে। তাৰ আগতে সি এটা ডাঙৰ সিদ্ধান্ত লৈছিল। অষ্ট্ৰেলিয়াৰ দুবাৰৰ বিশ্বকাপ বিজয়ী ক্ৰিকেটাৰগৰাকীয়ে নতুন বছৰৰ প্ৰথম দিনাই এদিনীয়া ক্ৰিকেটৰ পৰা অৱসৰ গ্ৰহণ কৰে।
অৱশ্যে ২০২৫ চনৰ চেম্পিয়নছ ট্ৰফীত যদি তেওঁৰ প্ৰয়োজন হয় তেন্তে অনাগত দিনত এই সিদ্ধান্তৰ বিষয়ে চিন্তা কৰিব পাৰিব বুলিও তেওঁ কয়। একেদিনাই ৱাৰ্নাৰক সংযুক্ত আৰব আমিৰশ্বাহীৰ দল ডুবাই কেপিটেলছে নতুন এচাইনমেণ্ট দিছে। পৰৱৰ্তী ছিজনত তেওঁক অধিনায়ক হিচাপে নিযুক্তি দিয়া হয়।
সোমবাৰে এখন সংবাদমেলত ৱাৰ্নাৰে কয় যে ভাৰতে বিশ্বকাপ জয় কৰাৰ আগতেই তেওঁ এদিনীয়া ক্ৰিকেট ত্যাগ কৰাৰ কথা ভাবিছিল। তেওঁ কয়, এইবাৰ পৰিয়ালটোক সময় দিয়াৰ প্ৰয়োজন আছে। সেইবাবেই মই এদিনীয়া ক্ৰিকেটৰ পৰা আঁতৰি যোৱাৰ সিদ্ধান্ত লৈছো। এই কথা এবাৰ বিশ্বকাপৰ সময়ত কৈছিলো। ভাৰতৰ মাটিত এখন বিশ্বকাপ এক বৃহৎ সাফল্য। গতিকে মই এদিনীয়া ক্ৰিকেটৰ পৰা অৱসৰ ল’ব বিচাৰো আৰু বিভিন্ন দেশৰ টি-২০ লীগত খেলাত মনোনিৱেশ কৰিব বিচাৰো। আমাৰ এদিনীয়া ক্ৰিকেট দলটোৱেও আগবাঢ়ি যোৱাৰ সময় আহি পৰিছে।’
তেওঁ লগতে কয়, ‘মই জানো যে চেম্পিয়নছ ট্ৰফী সমুখত। তেতিয়ালৈকে যদি মই ভাল ক্ৰিকেট খেলো বা খেলৰ সৈতে জড়িত হৈ থাকোঁ, আৰু যদি সেই সময়ত অষ্ট্ৰেলিয়াক মোৰ প্ৰয়োজন হয়, তেন্তে মই আকৌ এদিনীয়া ক্ৰিকেট খেলিব পাৰিম।”
বিশ্বকাপৰ ফাইনেলখন দেশৰ হৈ ৱাৰ্নাৰৰ অন্তিমখন এদিনীয়া মেচ। ৩৭ বছৰীয়া ক্ৰিকেটাৰগৰাকীয়ে ১৬১খন এদিনীয়া খেলত ৬৯৩২ ৰান সংগ্ৰহ কৰিছে। তেওঁৰ হাতত আছে ২২ শতক আৰু ৩৩টা পঞ্চাশ। এদিনীয়া ফৰ্মেটত অষ্ট্ৰেলিয়াৰ ষষ্ঠ সৰ্বাধিক ৰান সংগ্ৰহকাৰী হিচাপে নিজৰ কেৰিয়াৰৰ অন্ত পেলায়। শতক তালিকাত ৰিকি পণ্টিঙৰ পিছতে তেওঁ দ্বিতীয় স্থানত আছে।
Continue Reading
