ডিজিটেল ডেস্ক: গৌৰৱময় আন্তঃৰাষ্ট্ৰীয় কেৰিয়াৰৰ অৱসান ঘটালে ভাৰতৰ কিংবদন্তী ক্ৰিকেটাৰ ঝুলন গোস্বামীয়ে। আজি ইংলেণ্ডৰ বিৰুদ্ধে লৰ্ডছত শৃংখলাৰ অন্তিমখন মেচত অন্তিমবাৰৰ বাবে নীলা জাৰ্চী পৰিধান কৰি খেলপথাৰত অৱতীৰ্ণ হ’ল মহিলা ক্ৰিকেট বিশ্বৰ মহাতাৰকা ঝুলনে। আন্তৰ্জাতিক ক্ৰিকেটত আজি নিজৰ অন্তিমটো অভাৰত ইংলেণ্ডৰ কেট ক্ৰছৰ উইকেট দখল কৰি এই বিশেষ ক্ষণ স্মৰণীয় কৰি ৰাখি তাৰকাগৰাকীয়ে। যোৱা দুটা দশকতকৈও অধিক সময় ধৰি ভাৰতীয় দলৰ গুৰুত্বপূৰ্ণ সদস্য হিচাপে প্ৰদৰ্শন আগবঢ়াই অহা ঝুলন গোস্বামীক ভাৰতীয় দলেও দৰ্শনীয় জয়েৰে এক উপহাৰ প্ৰদান কৰে।
মহিলা ক্ৰিকেটৰ ইতিহাসত সৰ্বকালৰ এগৰাকী শ্ৰেষ্ঠ বেগী বলাৰ তথা কেথ্ৰিন ফিটজপেট্ৰিকৰ অৱসৰৰ পিছত দ্ৰুততম বলাৰ হিচাপে পৰিগণিত গোস্বামীয়ে ইতিপূৰ্বে ২০১৮ চনৰ আগষ্টত টি-২০ ক্ৰিকেটৰ পৰা অৱসৰ ঘোষণা কৰিছিল। উল্লেখ্য যে চলিত বৰ্ষৰ মাৰ্চত অনুষ্ঠিত হোৱা মহিলা বিশ্বকাপৰ পাছৰ পৰাই মহিলা বিশ্বকাপৰ পাছৰ পৰাই ভাৰতীয় দলৰ বাহিৰত আছিল গোস্বামী। শ্ৰীলংকাৰ বিৰুদ্ধে শেহতীয়া এদিনীয়া শৃংখলাত তেওঁক বিশ্ৰাম দিয়া হৈছিল।
২০০২ চনৰ ৬ জানুৱাৰীত চেন্নাইত ইংলেণ্ডৰ বিৰুদ্ধে ভাৰতৰ হৈ অভিষেক ঘটোৱাৰ পিছত নিজৰ ২০ বছৰীয়া ক্ৰিকেট কেৰিয়াৰত ঝুলন গোস্বামী মহিলা ক্ৰিকেট ইতিহাসৰ সৰ্বাধিক উইকেট সংগ্ৰহকাৰী বলাৰ হিচাপে পৰিগণিত হৈছে। তিনিওটা ফৰ্মেটত ৩৫৫ টা উইকেট দখল কৰি কেৰিয়াৰ সামৰণি মাৰিলে কিংবদন্তী বলাৰগৰাকীয়ে।
কেৰিয়াৰৰ ১২ খন টেষ্ট, ২০৪ খন এদিনীয়া আৰু ৬৮ খন টি-২০ ত ঝুলন গোস্বামীৰ নামত আছে ক্ৰমে ৪৪, ২৫৫ আৰু ৫৬ টা উইকেট। তদুপৰি নিম্নক্ৰমত এগৰাকী বেটাৰ হিচাপেও তাৰকাগৰাকীয়ে টেষ্টত দুটা অৰ্ধশতকসহ ২৯১, এদিনীয়াত এটা অৰ্ধশতকসহ ১,২২৮ আৰু টি-২০ ত ৪০৫ ৰান সংগ্ৰহ কৰে।
উল্লেখ্য যে ২০১৭ চনৰ মে’ মাহত কেথ্ৰিন ফিটজপেট্ৰিকৰ নামত থকা সৰ্বাধিক এদিনীয়া উইকেট (১৮০) ৰ ৰেকৰ্ড ভংগ কৰি এদিনীয়াত এক নতুন অভিলেখ স্থাপন কৰিছিল। তাৰ পিছতে ২০১৮ চনৰ ৭ ফেব্ৰুৱাৰীত এদিনীয়াত ২০০ টা উইকেট দখল কৰা বিশ্বৰ প্ৰথম গৰাকী মহিলা ক্ৰিকেটাৰ হিচাপে পৰিগণিত হৈছিল গোস্বামী। বিগত বিশ্বকাপত ঝুলনে আন এক ঈৰ্ষণীয় সাফল্যৰে এদিনীয়াত স্পৰ্শ কৰিছিল ২৫০ টা উইকেটৰ মাইলষ্ট’ন।
এই দীঘলীয়া কেৰিয়াৰত চাৰিখনকৈ বিশ্বকাপতো ভাৰতক প্ৰতিনিধিত্ব কৰা তাৰকাগৰাকীয়ে ভাৰতীয় দলটোৰ অধিনায়কৰ দায়িত্বও বহন কৰিছিল। ২০০৭ চনত আই চি চি- ৰ বৰ্ষশ্ৰেষ্ঠ মহিলা ক্ৰিকেটাৰৰ সন্মান লাভ কৰা গোস্বামীক ২০১০ চনত অৰ্জুন সন্মান আৰু ২০১২ চনত পদ্মশ্ৰীৰে সন্মানিত কৰে ভাৰত চৰকাৰে।
উল্লেখ্য যে বিগত মহিলা বিশ্বকাপৰ পাছতে আন এগৰাকী কিংবদন্তী ভাৰতীয় মহিলা ক্ৰিকেট তাৰকা মিতালী ৰাজেও অৱসৰ গ্ৰহণ কৰিছিল। মিতালীৰ নামতে আছে আন্ত:ৰাষ্ট্ৰীয় মহিলা ক্ৰিকেটৰ সৰ্বাধিক ৰানৰ অভিলেখ। এতিয়া আন্ত:ৰাষ্ট্ৰীয় মহিলা ক্ৰিকেটৰ সৰ্বাধিক উইকেট দখলকাৰী বলাৰ ঝুলন গোস্বামীৰ অৱসৰে মহিলা ক্ৰিকেটৰ এক গৌৰৱময় যুগৰ অন্ত পেলালে।
Continue Reading
