ডিজিটেল ডেস্কঃ অশান্ত হৈয়েই আছে মণিপুৰ। ৰাজ্য খনত শেহতীয়াকৈ কেইবাটাও স্থানৰ পৰা সংঘৰ্ষৰ খবৰ পোৱা গৈছে। জনতাৰ আক্ৰমণত ইম্ফলত এজন আৰক্ষী নিহত হোৱাৰ লগতে আন দুজন আৰক্ষী গুৰুতৰভাৱে আহত হৈছে। খবৰ অনুসৰি উন্মত্ত জনতাই কেৰেনফেবি আৰু থাঙ্গালাভাইৰ আৰক্ষী চকীত আক্ৰমণ কৰে আৰু আৰক্ষী চকীত থকা সকলো অস্ত্ৰ-শস্ত্ৰ লুটি লৈ যায়। হেংগাং আৰু চিংজামেই অঞ্চলতো একাংশ লোকে আৰক্ষীৰ পৰা অস্ত্ৰ-শস্ত্ৰ লুটিবলৈও চেষ্টা কৰাৰ খবৰ আহিছে।
শেহতীয়াকৈ ক্ষুব্ধ জনতাই বিষ্ণুপুৰ জিলাৰ এটা আৰক্ষী চকীত আক্ৰমণ চলাইছে। আৰক্ষী চকী খনত ৫০০ ৰো অধিক পুৰুষ আৰু মহিলা সমবেত হৈ আক্ৰমণ চলায়। তেওঁলোকে এএফ ৰাইফল, আইএনএছএএছ ৰাইফলৰ লগতে লাইট মেচিনগান আৰু পিষ্টলকে ধৰি বহু অস্ত্ৰ-শস্ত্ৰ সুটি লৈ যায়। আৰক্ষীয়ে প্ৰায় ৩৫০ ৰাউণ্ড গুলীচালনা কৰি জনতাক বাধা দিবলৈ চেষ্টা চলায়ো ব্যৰ্থ হয়।
আনহাতে, পশ্চিম ইম্ফলৰ চেঞ্জাম চিৰাং অঞ্চলত , আৰক্ষী বাহিনীৰ ওপৰত গুলীবৰ্ষণ কৰে দুৰ্বৃত্তই। আৰক্ষীয়ে সন্দেহ কৰিছে যে উগ্ৰপন্থীয়ে এই গুলীচালনা কৰিছে। এজন আৰক্ষীজনৰ মূৰত গুলী লাগে আৰু তেওঁৰ মৃত্যু হয়। এই ঘটনাত কমেও ২৫ জন লোক আহত হোৱাৰ খবৰ পোৱা গৈছে।
ৰাজ্যজুৰি সংঘটিত হিংসাত্মক ঘটনাৰ পিছত মণিপুৰ আৰক্ষীয়ে এটা বিবৃতি জাৰি কৰিছে। আৰক্ষীয়ে বিবৃতিত কৈছে "যোৱা ২৪ ঘণ্টাত ৰাজ্যখনৰ পৰিস্থিতি অতি সংবেদনশীল হৈ পৰিছে। উত্তেজিত লোকসকলে প্ৰতিবাদ কৰিবলৈ কেইবাঠাইতো সমবেত হৈছিল। কেইবাঠাইতো গুলীচালনাৰ ঘটনা ঘটিছে । ইতিমধ্যে ১,০০০ ৰো অধিক লোকক গ্ৰেপ্তাৰ কৰা হৈছে। "
Continue Reading
