ডিজিটেল ডেস্কঃ অশান্ত মণিপুৰত এইবাৰ অসম ৰাইফলছ ৰাইজৰ ৰোষৰ সন্মুখীন হৈছে। ৰাইজৰ হেঁচাত চেকপইণ্টসমূহৰ পৰা অসম ৰাইফলছক আঁতৰাই দিয়া হৈছিল। সেনাৰ বাহিনীটোৰ বিৰুদ্ধে মুখ্যতঃ মে’ মাহৰে পৰাই মহিলাসকলে প্ৰতিবাদৰ জনাই আহিছিল।সোমবাৰে আবেলি মণিপুৰৰ এডিজিপিয়ে এই সন্দৰ্ভত এটা বিবৃতি জাৰি কৰিছিল।
বিষ্ণুপুৰ-কাংবোই অঞ্চলৰ সংবেদনশীল এলেকাৰ চেকপইণ্টৰ পৰা অসম ৰাইফলছৰ নজন জোৱানক আঁতৰ কৰা হৈছে ।সেই ঠাইত আৰক্ষী আৰু চিআৰপিএফ মোতায়েন কৰা হৈছে। বিষ্ণুপুৰৰ এক গুৰুত্বপূৰ্ণ চেকপইণ্ট মইৰাং লামখেইৰ পৰা অসম ৰাইফলছ প্ৰত্যাহাৰ কৰা হৈছে। তাৰ পৰিৱৰ্তে সেই স্থানতো চিআৰপিএফ মোতায়েন কৰা হৈছে। উল্লেখ্য অসম ৰাইফলছক কেন্দ্ৰীয় গৃহ মন্ত্ৰালয়ৰ দ্বাৰা নিয়ন্ত্ৰণ কৰা হয়।
সেনৈা বাহিনীটোৰ বিৰুদ্ধে নিৰীহক অত্যাচাৰ চলোৱাৰ অভিযোগ উঠি আহিছে। সেয়ে মহিলাসকলে অসম ৰাইফলছৰ বিৰুদ্ধে একত্ৰিত হৈ ভিন্ন ঠাইত প্ৰতিবাদ কৰি আহিছে। ইম্ফল পূব, ইম্ফল পশ্চিম, থৌবাল, বিষ্ণুপুৰ আৰু কাকচিং জিলাৰ পৰা অসম ৰাইফলছ প্ৰত্যাহাৰ কৰাৰ দাবী উত্থাপিত হৈছে। যোৱা তিনি মাহধৰি মণিপুৰ আৰক্ষী কমাণ্ডোসকলৰ সৈতে অসম ৰাইফলছৰ সংঘৰ্ষৰ ভিডিঅ' পোহৰলৈ আহিছে। অতীততো মেইটেই মহিলা সংগঠন মীৰা পাইবিয়ে অসম ৰাইফলছৰ বিৰুদ্ধে অত্যাধিক বল প্ৰয়োগৰ অভিযোগ উত্থাপন কৰিছিল।
মণিপুৰ যোৱা চাৰি মাহ ধৰি মেইটেই-কুকিৰ মাজত লগা জাতিগত হিংসাৰে জ্বলি আছে। অস্থিৰতা দূৰ কৰিবলৈ ৰাজ্য খনত বৃহৎ সংখ্যক কেন্দ্ৰীয় বাহিনী মোতায়েন কৰা হৈছিল। কেন্দ্ৰীয় আৰু ৰাজ্য চৰকাৰে পৰিস্থিতি নিয়ন্ত্ৰণ কৰাত ব্যৰ্থ হৈছে। মণিপুৰ আৰু মোদী চৰকাৰ ৰাজ্য খনৰ আইন-শৃংখলা পৰিস্থিতিক লৈ উচ্চতম ন্যায়ালয়ৰো তীব্ৰ সমালোচনাৰ সন্মুখীন হৈছে।
Continue Reading
