ডিজিটেল ডেস্কঃ মৃত্যুৰ তিনি বছৰৰ পাছত ডিয়েগো মাৰাডোনাক কৰ ফাঁকিৰ অভিযোগৰ পৰা মুক্ত কৰা হয়। আৰ্জেণ্টিনাৰ বিশ্বকাপ বিজয়ীগৰাকীৰ বিৰুদ্ধে ইটালীৰ ক্লাব নাপোলিৰ হৈ খেলি থকাৰ সময়তে কৰ ফাঁকিৰ অভিযোগ উত্থাপন হৈছিল। অৱশেষত অন্ত পৰিল ৩০ বছৰীয়া আইনী যুঁজ।
১৯৮৫ চনৰ পৰা ১৯৯০ চনলৈকে নাপোলিৰ হৈ খেলি থকাৰ সময়তে মাৰাডোনাই ছবিৰ অধিকাৰ হিচাপে ধন লাভ কৰিছিল। সেই ধন লিচেনষ্টাইনৰ এটা ভুৱা কোম্পানীত বিনিয়োগ কৰি কৰ ফাঁকি দিয়াৰ অভিযোগ উত্থাপন হৈছিল মাৰাডোনাৰ বিৰুদ্ধে।
২০১৮ চনত আদালতৰ ৰায়দানত মাৰাডোনাক কৰ ফাঁকিৰ অভিযোগ উত্থাপন কৰা হৈছিল। ৰোমৰ এখন আদালতে এই অভিযোগ খাৰিজ কৰে। ২০২০ চনৰ নৱেম্বৰ মাহত হৃদৰোগত আক্ৰান্ত হৈ মৃত্যু হয় মাৰাডোনাৰ। নাপোলি চহৰৰ লগতে আৰ্জেণ্টিনাতো তেওঁক ‘ফুটবলৰ ঈশ্বৰ’ হিচাপে পূজা কৰা হয়। নাপোলিৰ ষ্টেডিয়ামৰ নামো মাৰাডোনাৰ নামেৰে ৰখা হৈছে।
মাৰাডোনাৰ অধিবক্তাই কয় যে শনিবাৰৰ ৰায়দানে সমৰ্থন, ফুটবলৰ খেল আৰু মাৰাডোনাৰ স্মৃতিৰ সৈতে ন্যায় কৰিলে। যোৱা ৩০ বছৰ ধৰি সহ্য কৰা যন্ত্ৰণা অৱশেষত উপশম পালে বুলিও তেওঁ কয়। ইটালীত মাৰাডোনাৰ কেইবাটাও সম্পত্তি জব্দ কৰা হৈছে। এইবাৰ মাৰাডোনাৰ পৰিয়ালে ক্ষতিপূৰণ দাবী কৰিব পাৰে।
Continue Reading
