অসমীয়াতে শপত গ্ৰহণ কৰিলে সৰ্বানন্দ সোণোৱালে

নৰেন্দ্ৰ মোদী নেতৃত্বাধীন চৰকাৰখনত সোণোৱালৰ মন্ত্ৰী হিচাপে এয়া তৃতীয় কাৰ্যকাল।অসমৰ প্ৰাক্তন মুখ্যমন্ত্ৰী সৰ্বানন্দ সোণোৱালে পুনৰ মোদী ৩.০ত মন্ত্ৰী হিচাপে সেৱা আগবঢ়োৱাৰ  সুযোগ লাভ কৰিছে। তেওঁ পূৰ্বৰ মন্ত্ৰীসভাত  বন্দৰ, জাহাজ আৰু জলপথ দপ্তৰৰ মন্ত্ৰী হৈ থকাৰ লগতে  আয়ুষৰ মন্ত্ৰী হিচাপেও কাৰ্যনিৰ্বাহ কৰিছিল। সোণোৱালে ২০১৬-২০২১ বৰ্ষলৈ ভিতৰত অসমৰ মুখ্যমন্ত্ৰী হিচাপে কাৰ্যনিৰ্বাহ কৰিছিল। ২০০৪ চনত তেওঁ  লোকসভা নিৰ্বাচনত অসম গণ পৰিষদৰ প্ৰাৰ্থী হিচাপে ডিব্ৰুগড়ৰ পৰা  প্ৰতিদ্বন্দ্বিতা কৰিছিল আৰু প্ৰাক্তন কেন্দ্ৰীয় মন্ত্ৰী পবন সিং ঘাটোৱাৰক পৰাস্ত কৰিছিল । পিছলৈ সোণোৱালে ২০১১ চনত ভাৰতীয় জনতা পাৰ্টিত যোগদান কৰে আৰু ২০১৪ চনত লখিমপুৰৰ পৰা পুনৰ লোকসভালৈ নিৰ্বাচিত হয় । ২০১৬ চনত  সোণোৱাল অসমৰ মুখ্যমন্ত্ৰী হৈছিল আৰু ২০২১ চনলৈকে এই পদত কাৰ্যনিৰ্বাহ কৰিছিল। 

আজি বিজেপিৰ সাংসদ ৰাধা মোহন সিং আৰু ফাগন সিং কুলাষ্টে অধ্যক্ষ পেনেলৰ  সদস্য হিচাপে শপত গ্ৰহণ কৰে। অৱশ্যে কংগ্ৰেছৰ সাংসদ কে সুৰেশ, ডি এম কেৰ সাংসদ টি আৰ বালু, আৰু টি এম চিৰ সুদীপ বন্দ্যোপাধ্যায়ে পেনেলৰ সদস্য হিচাপে শপত গ্ৰহণৰ কাৰ্য্যবিধিৰ পৰা দূৰত থাকে। পৰৱৰ্তী সময়ত কেন্দ্ৰীয় মন্ত্ৰী ৰাজনাথ সিং, অমিত শ্বাহ, নীতিন গাডকাৰী, শিৱৰাজ সিং চৌহান, মনোহৰ লাল, পীযুষ গোৱাল, জিতনৰাম মাঝি, ৰাজীৱ ৰঞ্জন ওৰফে লল্লন সিং, ড° বীৰেন্দ্ৰ কুমাৰ, কিৰেন ৰিজিজু, চিৰাগ পাছোৱান, জ্যোতিৰাদিত্য সিন্ধিয়া, অন্নপূৰ্ণা দেৱী আদিয়ে  লোকসভাৰ সদস্য হিচাপে শপত গ্ৰহণ কৰে। কেন্দ্ৰীয় মন্ত্ৰী এইচ ডি কুমাৰস্বামী আৰু প্ৰহ্লাদ যোশীয়ে কানাড়া ভাষাত শপত গ্ৰহণ কৰাৰ বিপৰীতে ধৰ্মেন্দ্ৰ প্ৰধান আৰু জুৱেল ওৰামে ওডিয়াত শপত গ্ৰহণ কৰে। কেন্দ্ৰীয় মন্ত্ৰী সৰ্বানন্দ সোণোৱালে অসমীয়াত শপত গ্ৰহণ কৰে আৰু কেন্দ্ৰীয় মন্ত্ৰী কে ৰাম মোহন নাইডু তথা  জি কিষাণ ৰেড্ডীয়ে তেলেগু ভাষাত শপতগ্ৰহণ কৰে। কেন্দ্ৰীয় মন্ত্ৰী চি আৰ পাটিলে গুজৰাটী ভাষাত শপতগ্ৰহণ কৰে। কেন্দ্ৰীয় মন্ত্ৰী প্ৰতাপৱ যাধৱে মাৰাঠী ভাষাত শপত গ্ৰহণ কৰাৰ বিপৰীতে ড° জিতেন্দ্ৰ সিঙে ডগ্ৰী ভাষাত শপতগ্ৰহণ কৰে। কেন্দ্ৰীয় মন্ত্ৰী সুৰেশ গোপীয়ে মালয়ালম ভাষাত শপত গ্ৰহণ কৰাৰ বিপৰীতে আন এজন কেন্দ্ৰীয় মন্ত্ৰী সুকান্ত মজুমদাৰে বাংলা ভাষাত শপত গ্ৰহণ কৰে। কেন্দ্ৰীয় মন্ত্ৰী দুৰ্গদাস উইকেয়ে সংস্কৃতত শপত গ্ৰহণ কৰে।