অসমকে ধৰি ৮খন ৰাজ্যৰ বিমান ইন্ধনৰ ওপৰত থকা কৰ কমাবলৈ আহ্বান কেন্দ্ৰীয় মন্ত্ৰী জ্যোতিৰাদিত্য সিন্ধিয়াৰ

ডিজিটেল ডেস্কঃ বিমান ইন্ধনৰ কৰ কমাবলৈ দেশৰ আঠখন ৰাজ্য আৰু কেন্দ্ৰীয় শাসিত অঞ্চললৈ আহ্বান জনাইছে কেন্দ্ৰীয় চৰকাৰৰ অসামৰিক বিমানসেৱা মন্ত্ৰী জ্যোতিৰাদিত্য সিন্ধিয়াই। মঙলবাৰে তেওঁ কয়ে মহামাৰিৰ পাছত বিমান যাত্ৰাৰ ব্যাপক চাহিদা বৃদ্ধি পাইছে। সেয়ে ৰাজ্যকেইখনে বিমান ইন্ধনৰ কৰ লঘু কৰক।

নতুন দিল্লীত এখন বৈঠকত সিন্ধিয়াই কয়ে দেশৰ ঘৰুৱা বিমানসেৱা ক’ভিডৰ পাছত পুনৰ ঠন ধৰি উঠিছে, যাত্ৰীৰ সংখ্যা তীব্ৰভাৱে বৃদ্ধি পাইছে। কিন্তু বিমান ইন্ধনৰ ওপৰত থকা ভেটৰ পৰিমাণ আঠোখন ৰাজ্য আৰু কেন্দ্ৰীয় শাসিত অঞ্চলসমূহত ২০-৩০ শতাংশৰ ভিতৰত। সেয়ে ইয়াক কমাবলৈ তেওঁ তেওঁ আহ্বান জনাইছে।

সিন্ধিয়াই উল্লেখ কৰা এই ৰাজ্যকেইখন হৈছে অসম, গোৱা, দিল্লী, মহাৰাষ্ট্ৰ, পশ্চিম বংগ, ৰাজস্থান আৰু তামিলনাডু। তেওঁ কয় যে বৰ্তমানলৈকে ২৮ খন ৰাজ্য আৰু কেন্দ্ৰীয় শাসিত অঞ্চলত বিমান ইন্ধনৰ ওপৰত ১ৰ পৰা ৪ শতাংশলৈকে ভেটৰ ব্যৱস্থা আছে।

দেশৰ বিমান সেৱাক গুৰুত্বপূৰ্ণ বুলি মন্তব্য কৰি সিন্ধিয়াই কয় যে ইয়াক সহজসাধ্য আৰু অত্যধিক কৰৰ পৰা ৰেহাই কৰাটো অত্যন্ত প্ৰয়োজনীয়।