অসমত সময়ে-সময়ে উপ-নিৰ্বাচন অনুষ্ঠিত হৈ থাকিব; মুখ্যমন্ত্ৰীৰ এই মন্তব্যই কি সূচায়?

ডিজিটেল ডেস্কঃ অসমত এতিয়া ড০ হিমন্ত বিশ্ব শৰ্মা নেতৃত্বত চৰকাৰ চলিছে৷ হিমন্ত বিশ্ব শৰ্মা চৰকাৰ মানে যেন এতিয়া একনায়কত্ববাদৰ চৰকাৰ৷ বিৰোধীৰ ত’ শব্দটোও শুনিব নোখোজে শাসনাধীষ্ঠ বিজেপি চৰকাৰে৷ বিজেপিয়ে এতিয়া ধন-বল, বাহুবল বা বিভিন্ন প্ৰলোভনেৰে নিজৰ আধিপত্য বিস্তাৰ কৰিব বিছাৰিছে বুলি ৰাইজৰ অভিযোগ আহিছে৷ এতিয়া যেন ৰাজ্যত শাসনাধীষ্ঠ বিজেপি চৰকাৰে কেৱল বিৰোধীৰ অস্তিত্ব নোহোৱা কৰাৰ চক্ৰান্তত নামিছে ৷ উল্লেখ্য যে, গণতন্ত্ৰ তেতিয়াহে শক্তিশালী হ’ব যেতিয়া বিৰোধী শক্তিশালী হ’ব৷ কিন্তু বিজেপিয়ে যেন এতিয়া চলে-বলে কৌশলে বিৰোধীৰ অস্তিত্ব নাইকিয়া কৰাৰ ষড়যন্ত্ৰত নামিছে৷ যিটো সুস্থ গণতন্ত্ৰৰ বাবে অশুভসূচক, যেন মূল্যবোধৰ ৰাজনীতি একেবাৰে বিসৰ্জন দিলে হিমন্ত বিশ্ব শৰ্মা নেতৃত্বাধীন ৰাজ্য চৰকাৰে৷ কেৱল প্ৰলোভন দি বিজেপিয়ে বিৰোধীৰ কেইবাজনো বিধায়কক বিজেপিত যোগদান কৰালে বুলি ৰাইজৰ অভিযোগ৷ এইক্ষেত্ৰত প্ৰথমে নাম উচ্চাৰিত হয় এআইইউডিএফৰ ভৱানীপুৰৰ সমষ্টিৰ বিধায়ক ফণী তালুকদাৰৰ কথা৷ বিজেপিয়ে বিধায়কগৰাকীৰ সমষ্টি উন্নয়নৰ বাবে ২০০০ কোটি টকাৰ পেকেজ দিব বুলি প্ৰলোভন দিয়াৰ পাছত বিজেপিত যোগদান কৰাইছিল, কিন্তু বাস্তৱত সেয়া হৈ নুঠিল৷ তাৰ পাছতে আহোঁ তিতাবৰ সমষ্টিৰ কংগ্ৰেছী বিধায়ক ভাস্কৰ বৰুৱাৰ প্ৰসংগলৈ, বিজেপিয়ে বিভিন্ন টোপ দি ভাস্কৰ বৰুৱাক বিজেপিলৈ অনাৰ কৌশল ৰচিছিল যদিও, কোনোবাখিনিত যে তেওঁলোকৰ অংক নিমিলিল আৰু তেওঁক বিজেপিলৈ আনিব নোৱাৰিলে৷ উল্লেখ্য যে, ৰাজ্যত এতিয়া উপ-নিৰ্বাচনৰ বতাহ বলি আছে৷ ৰাজ্যত এতিয়া মাজুলিত উপ-নিৰ্বাচন হোৱাৰ পূৰ্ণ সম্ভাৱনা আছে৷ এই উপ-নিৰ্বাচনতো বিজেপিয়ে কিনা-বেচা ৰাজনীতিত নমাৰ সম্ভাৱনা আছে৷ ৰাজ্যৰ মুখ্যমন্ত্ৰীজনে শেহতীয়াকৈ মন্তব্য কৰিছে যে, অসমত সময়ে-সময়ে উপ-নিৰ্বাচন অনুষ্ঠিত হৈ থাকিব, আৰু তেওঁৰ এই মন্তব্যই যথেষ্ট তাৎপৰ্য বহন কৰিছে৷