অসংসদীয় শব্দৰে তুলনা ৰঞ্জন গগৈক: নতুন বিতৰ্কৰ অৱতাৰণা মহুৱা মৈত্ৰৰ

১৪ জুলাইৰ দুপৰীয়া ১.১৯ বজাত তেওঁ টুইট কৰি লিখিছিল, অসংসদীয় শব্দৰ সলনি নতুন টুইটাৰ শৃংখলাৰ মোৰ প্ৰথমটো। নিষিদ্ধ শব্দ-যৌন উৎপীড়ন। প্ৰতিস্থাপন - মিঃ গগৈ৷ টিএমচিৰ সাংসদ মহুৱা মৈত্ৰই শুকুৰবাৰে অসংসদীয় শব্দৰ তালিকাৰ সমালোচনা অব্যাহত ৰাখিছিল আৰু তেওঁ অসংসদীয় শব্দৰ সলনি শীৰ্ষক এটা টুইটাৰ শৃংখলাত শেহতীয়াটো পোষ্ট কৰিছিল।

মহুৱা মৈত্ৰৰ সেই টুইটটোৰ পাছতে ৰাজ্যজুৰি সৃষ্টি হৈছিল তীব্ৰ প্ৰতিক্ৰিয়াৰ৷ যৌন উৎপীড়কক গগৈৰ সৈতে তুলনা কৰাত জাঙুৰ খাই উঠিছে আহোম জনগোষ্ঠীৰ লোকসকল৷ মহুৱা মৈত্ৰই গগৈ উপাধিক লৈ তুচ্চ তাচ্ছিল্য কৰাত সমগ্ৰ অসমীয়া জাতি বা আহোম জনগোষ্ঠীয়ে অপমানিত হোৱা বুলি এতিয়া চৰ্চা চলিছে সামাজিক মাধ্যমত৷ 

সামাজিক মাধ্যমত যৌন নিৰ্যাতনৰ বিপৰীতে মিষ্টাৰ গগৈ ব্যৱহাৰ কৰিবলৈ পৰামৰ্শ দিয়া এইগৰাকী সাংসদৰ বিৰুদ্ধে এতিয়া সমগ্ৰ অসমতে প্ৰতিক্ৰিয়াৰ সৃষ্টি হৈছে৷ টুইটাৰতে কেইবাগৰাকীও বিশিষ্ট অসমীয়াই উভতি ধৰাত ৰিটুইট কৰি মিষ্টাৰ গগৈ হিচাপে কাক ইংগিত কৰিছিল সেই কথা ক’লেই সাৰি যাব নেকি সাংসদগৰাকী? এই প্ৰশ্নও এতিয়া সৰ্বত্ৰ উত্থাপিত হৈছে৷ আনকি, নিচৰ্ত ক্ষমা বিচৰাৰো দাবী উঠিছে অসমৰ সামাজিক-ৰাজনৈতিক প্ৰেক্ষাপটত৷

প্ৰতিক্ৰিয়া ব্যক্ত কৰিছে অসমৰ কেইবাগৰাকীও ৰাজনীতিবিদে৷ সাংসদ অজিত কুমাৰ ভূঞাই কয়, মহুৱা মৈত্ৰ এগৰাকী সচেতন ৰাজনীতিক৷ তেও হয়তো কিবা  যুক্তিৰ আধাৰতে কথাটো কৈছে৷ তেওঁ হয়তু ৰঞ্জন গগৈৰ কথা কৈছে৷ ৰঞ্জন গগৈৰ বিষয়টো সেই সময়ত চৰ্চিত হৈছিল৷ একেদৰে, প্ৰতিক্ৰিয়া ব্যক্ত কৰিছে বিধায়ক জাকিৰ হুছেইন শিকদাৰে৷ যাক টাৰ্গেট কৰিছে তেওঁ উত্তৰ দিব। ব্যক্তিজনৰ বিৰুদ্ধে পূৰ্বেও অভিযোগ শুনিছিলোঁ। তেওঁ উত্তৰ দিয়ালৈ অপেক্ষা কৰিছোঁ৷ ইফালে, মহুৱা মৈত্ৰক ধিক্কাৰ জনাইছে বিজেপিৰ ৰাজ্যিক সভাপতি ভৱেশ কলিতাই৷ তেওঁ কয়, মহুৱা মৈত্ৰৰ অসমৰ ওপৰত কোনো জ্ঞান নাই৷ অসমৰ Caste - Communityৰ ওপৰত মন্তব্য দিয়াৰ পৰা আতঁৰত থাকক তেওঁ৷ ৰঞ্জন গগৈৰ দৰে এজন ব্যক্তিক অপমানসূচক মন্তব্য দিয়াটো অনুচিত বুলি কলিতাই মন্তব্য কৰে৷