ডিজিটেল ডেস্কঃ গৰ্ভত থকা সন্তানৰ স্বাস্থ্য ভাল নহয়, সেয়ে দিল্লী উচ্চ ন্যায়ালয়ৰ পৰা গৰ্ভপাতৰ অনুমতি পালে এগৰাকী অন্তঃসত্বা মহিলাই। ২৬ বছৰ বয়সীয়া মহিলাগৰাকী ৩৩ সপ্তাহৰ গৰ্ভৱতী আছিল।
কিন্তু গৰ্ভধাৰণৰ পৰীক্ষা কৰাৰ পাছত জানিব পৰা গৈছিল যে সন্তানটোৰ ভ্ৰুণৰ মস্তিষ্কৰ কাৰ্যকলাপ স্বাভাৱিক নহয়। সেইবাবেই গৰ্ভপাতৰ অনুমতি বিচাৰিছিল। আবেদনকাৰী অন্তঃসত্বা মহিলাগৰাকীৰ উপৰিও তেওঁৰ স্বামী আৰু চিকিৎসকসকলেও আদালতত বক্তব্য দিছিল।
দিল্লী উচ্চ ন্যায়ালয়ৰ বিচাৰপতি প্ৰতিভা এম সিংহই এই অনুমতি প্ৰদান কৰিছে। বিচাৰপতিগৰাকীয়ে কয়- “বিষয়টো বিবেচনা কৰাৰ পাছত আদালতে এই সিদ্ধান্ত লৈছে যে এইক্ষেত্ৰত মাকৰ সিদ্ধান্তই চূড়ান্ত। সেইবাবেই গৰ্ভপাতৰ অনুমতি দিয়া হৈছে। আবেদনকাৰীয়ে তেওঁৰ পছন্দৰ যিকোনো হস্পিতালত সোনকালেই গৰ্ভপাত কৰিব পাৰিব।”
উল্লেখ্য যে ছেপ্টেম্বৰ মাহত চুপ্ৰীম কোৰ্টে গৰ্ভপাত সম্পৰ্কত এটা গুৰুত্বপূৰ্ণ ৰায় প্ৰদান কৰিছিল। কৈছিল যে দেশৰ সকলো নাৰীয়েই নিৰাপদভাৱে গৰ্ভপাত কৰাব পাৰিব। গৰ্ভপাতৰ ক্ষেত্ৰত বিবাহিত আৰু অবিবাহিত সকলো নাৰীকে চুপ্ৰীম কোৰ্টে সামৰি লৈছে। ২০ৰ পৰা ২৪ সপ্তাহৰ ভিতৰত অবিবাহিত মহিলাসকলেও গৰ্ভপাত কৰাব পাৰিব। ইয়াৰ পাছত গৰ্ভপাত কৰিলে আদালতৰ অনুমতি ল’ব লাগিব বুলি কোৱা হৈছিল।
Continue Reading
