পশ্চিম বংগ বিধানসভাত উত্তপ্ত পৰিস্থিতি ; বিজেপিৰ ৫জন বিধায়কক নিলম্বন

ডিজিটেল ডেস্কঃ পশ্চিম বংগ বিধানসভাত বৃহস্পতিবাৰে উত্তপ্ত পৰিস্থিতিৰ সৃষ্টি হয়। শাসকীয় তৃণমূল কংগ্ৰেছ আৰু বিৰোধী বিজেপিৰ বিধায়কৰ মাজত হোৱা তীব্র তর্কযুদ্ধই হুলস্থুলীয়া পৰিস্থিতিৰ সৃষ্টি কৰে।

ইয়াৰ পাছতে অধ্যক্ষই বিজেপিৰ ৫জন বিধায়কক নিলম্বন কৰে। বেংগলী প্ৰব্ৰজনকাৰীৰ বিৰুদ্ধে আতিশয্যৰ অভিযোগৰ বিষয়ত এটা চৰকাৰী প্ৰস্তাৱক লৈ বিধানসভাৰ মজিয়া উত্তাল হৈ পৰে। যোৱা ২ ছেপ্টেম্বৰত বিৰোধী দলপতি শুভেন্দু অধিকাৰীৰ নিলম্বনক লৈ বিজেপিৰ বিধায়কসকলে শ্ল'গান দিয়ে আৰু শাসকীয় তৃণমূলৰ বিধায়কসকলেও শ্ল'গান দিব ধৰে। ফলত বিধানসভাৰ কাৰ্যক্ৰমণিকাত বাধাৰ সৃষ্টি হয়।

অধ্যক্ষ বিমান বেনাৰ্জীয়ে বিজেপিৰ চীফ হুইপ শংকৰ ঘোষক বিধানসভাৰ বাকীকেইদিনৰ সত্ৰৰ পৰা নিলম্বন কৰে যদিও ঘোষ বিধানসভা এৰিবলৈ সন্মত নোহোৱাত মার্শাল লগাই তেওঁক বাহিৰ কৰা হয়।

ইয়াকে লৈ দুয়োপক্ষৰ বিধায়কসকলৰ মাজত উত্তেজনাময় পৰিৱেশৰ সৃষ্টি হয়। পৰিস্থিতি নিয়ন্ত্ৰণ কৰিবলৈ দুয়ো পক্ষৰ মাজত মার্শালসকলে পহৰা দিয়ে। ইফালে, মুখ্যমন্ত্রী মমতা বেনার্জীয়ে বিজেপিয়ে সদনত তেওঁক কথা ক'বলৈ নিদিয়াৰ অভিযোগ তোলে। বেনাৰ্জীৰ ভাষণৰ পাছতেই বিজেপি বিধায়নী দলৰ বিধায়কসকলে সদন ত্যাগ কৰে।

উৎসঃ দৈনিক জনমভূমি