অতি পাশৱিক! দলবদ্ধ ধৰ্ষণ কৰি ৮ বছৰীয়া এটি কণমানিক উলিয়াই দিয়া হয় দুয়োটা চকু

ডিজিটেল ডেস্ক : মানৱীয়তাৰ সকলো সীমা অতিক্ৰম কৰা এটা বৰ্বৰ জঘন্য কাণ্ড। ৮ বছৰীয়া এটি কণমানি শিশুক দলবদ্ধ ধৰ্ষণ কৰি উলিয়াই দিয়া হয় দুয়োটা চকু, পাছত শিশুটিৰ মৃত্যু হোৱা বুলি ভাবি তাতেই পেলাই থৈ যায় যদিও শিশুটি দেহত তেতিয়াও আছিল প্ৰাণ। কোনো লোকে উদ্ধাৰ কৰি হাস্পতালত ভৰ্তি কৰায় শিশুটিক।

 এই অমানৱিক ঘটনাটো সংঘটিত হৈছে পাকিস্তানৰ সিন্ধ প্ৰদেশৰ উমাকোট চহৰৰ। এটি হিন্দু শিশুৰ ওপৰত এনে চৰম নিৰ্যাতনে সকলোকে এবাৰ হ’লেও ভাবিবলৈ বাধ্য কৰাব যে কিমান নিষ্ঠুৰ হ’লে এই কাণ্ড সংঘটিত কৰিব পাৰে। বৰ্তমানে হায়দৰাবাদৰ এখন চৰকাৰী চিকিৎসালয়ত জীৱন-মৃত্যুৰে যুঁজি আছে শিশুটি। শিশুটিক ইমানেই অত্যাচাৰ কৰা হৈছিল যে অতি সংকটজনক অৱস্থাত থকাৰ কথা সদৰী কৰে চিকিৎসকে।

 যোৱা ২৮ আগষ্টত সংঘটিত হৈছিল এই ঘটনা। ভুক্তভোগী কন্যাগৰাকী আছিল ভিল জনগোষ্ঠীৰ। কিন্তু এই ঘটনা তেতিয়াহে পোহৰলৈ আহে যেতিয়া এজন হিন্দু মানৱ অধিকাৰ কৰ্মীয়ে শিশুগৰাকীৰ এটা ভিডিঅ’ ছ’চিয়েল মিডিয়াৰযোগে শ্বেয়াৰ কৰে।

 জানিব পৰা মতে শিশুটি ঘৰৰ কাষৰে এখন দোকানলৈ গৈছিল, কিন্তু বহু সময় ধৰি উভতি নহাত মাতৃয়ে বিচাৰ-খোচাৰ কৰি আছিল যদিও কোনো শুংসূত্ৰ উলিয়াব পৰা নাছিল। পাছতহে শিশুটিৰ ওপৰত হোৱা এই চৰম নিষ্ঠুৰতাৰ কথা জানিব পাৰে পৰিয়ালৰ লোকে। কিন্তু বৰ্তমানলৈকে এই সন্দৰ্ভত কোনো লোককে গ্ৰেপ্তাৰ কৰিবলৈ সক্ষম হোৱা নাই আৰক্ষী।