ডিজিটেল ডেস্কঃ দক্ষিণ কোৰিয়াৰ বিৰোধী দলৰ মূল নেতা লি জে-ম্যুং নিজৰ দেশতে আক্ৰমণৰ বলি হৈছে। অটোগ্ৰাফ লোৱাৰ আগতে এজন অচিনাকি আক্ৰমণকাৰীয়ে ডিঙিত কটাৰী লগাই দিলে। সংকটজনক অৱস্থাত তেওঁক চিকিৎসালয়ত ভৰ্তি কৰোৱা হয়। ততাতৈয়াকৈ আৰক্ষীয়ে গ্ৰেপ্তাৰ কৰে অভিযুক্তক। দেশৰ ৰাষ্ট্ৰপতি য়ুন চুক-য়েওলে গুৰুত্বপূৰ্ণ ৰাজনৈতিক প্ৰতিদ্বন্দ্বীক আক্ৰমণৰ গৰিহণা দিয়ে।
ৰয়টাৰ সংবাদ সংস্থাৰ মতে, বিৰোধী নেতা লীয়ে দক্ষিণ কোৰিয়াৰ দক্ষিণ উপকূলীয় বন্দৰ বুছানলৈ বিশেষ ৰাজনৈতিক ভ্ৰমণলৈ গৈছিল। তেওঁ দলৰ সমৰ্থকসকলৰ সৈতে বুছানৰ প্ৰস্তাৱিত বিমানবন্দৰ পৰিদৰ্শন কৰিছিল। সংবাদ মাধ্যমৰ প্ৰতিনিধিৰ সৈতেও কথা পাতিছিল। সেই সময়ত হঠাৎ এজন আদবয়সীয়া ভদ্ৰলোকে লীৰ ওচৰলৈ আহিল, অটোগ্ৰাফ বিচাৰি। কোনোৱে একো বুজি পোৱাৰ আগতেই বিৰোধী দলৰ নেতাজনৰ ডিঙিৰ বাওঁফালে কটাৰীৰ মূৰটো থৈ দিয়া হ’ল। ভিৰৰ মাজত লীৰ সমৰ্থকসকলে চিঞৰি উঠিল।
বহু সমৰ্থকে বিৰোধী নেতাৰ ডিঙিৰ পৰা তেজ ওলোৱা বন্ধ কৰিবলৈ ৰুমাল হাতত লৈ থকা দেখা গৈছিল। তাৰ পিছতো অৱশ্যে তেওঁৰ ৰক্তক্ষৰণ বন্ধ নহ’ল। লগে লগে তেওঁক চিকিৎসালয়ত ভৰ্তি কৰোৱা হয়। দক্ষিণ কোৰিয়াৰ স্থানীয় সংবাদ মাধ্যমে দাবী কৰিছে যে লীৰ ডিঙিত এক চেণ্টিমিটাৰ দ ঘাঁ হৈছে। অৱশ্যে এই সন্দৰ্ভত এতিয়াও একো কোৱা নাই চিকিৎসালয় কৰ্তৃপক্ষই।
দক্ষিণ কোৰিয়াৰ বিৰোধী নেতা লি সেই দেশৰ গিয়ংগি প্ৰদেশৰ প্ৰাক্তন গৱৰ্ণৰ। ২০২২ চনৰ ৰাষ্ট্ৰপতি নিৰ্বাচনত বৰ্তমানৰ ৰাষ্ট্ৰপতি ইউনৰ হাতত সংকীৰ্ণভাৱে পৰাস্ত হৈছিল জনপ্ৰিয় নেতাগৰাকী।
Continue Reading
